Header Ads

ສານແຂວງອຸດົມໄຊ ຕັດສິນຈຳຄຸກຄົນລະ 5 ປີ ໂທດຖານຄ້າຂາຍສິ່ງເສບຕິດ



ໂດຍປະຕິບັດຕາມມາດຕາ 2 ຂອງກົດໝາຍ ວ່າດ້ວຍສານປະຊາຊົນ ສະບັບປັບປຸງປີ 2009, ມາດຕາ 214 ກົດໝາຍ ວ່າດ້ວຍການດໍາເນີນຄະດີອາຍາ ສະບັບປັບປຸງປີ 2012; ແລະ ອິງຕາມສໍານວນຄະດີ ເລກທີ 060/ຂຕ.ອ ລົງວັນທີ 28 ສິງຫາ 2018 ; ດັ່ງນັ້ນໃນວັນທີ 05 ສິງຫາ 2018 ຢູ່ທີ່ຫ້ອງປະຊຸມສານປະຊາຊົນຂັ້ນຕົ້ນ ແຂວງອຸດົມໄຊ ໄດ້ນຳເອົາໃບສັ່ງຟ້ອງຂອງອົງການໄອຍະການປະຊາຊົນແຂວງທີ່ເປັນໂຈດ ຂຶ້ນມາໄຕ່ຕອງ ແລະ ພິຈາລະນາຢ່າງລະອຽດຖີ່ຖ້ວນ ລວມທັງຂໍ້ມູນຫຼັກຖານການກະທຳຜິດ, ເອກະສານ ແລະ ຄໍາຮັບສາລະພາບຂອງຈຳເລີຍໃນມາດຕາ 146 ວ່າດ້ວຍບຸກຄົນ ຫຼື ກຸ່ມຄົນ ທີ່ພົ່ວພັນຢາເສບຕິດ ຂອງກົດໝາຍອາຍາ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໂດຍຊ່ອງໜ້າຈໍາເລີຍທັງສອງຄົນ ຄື: ທ້າວ ທຸລະນີ (ຫຼ້າ) ແບງຕະນະ; ອາຍຸ 28 ປີ, ອາຊີບ ຫ່ວາງງານ, ຢູ່ບ້ານນ້ຳແຊ, ເມືອງ ນາໝໍ້ (ຈຳເລີຍ01) ຖືກກັກຕົວຄັ້ງວັນທີ 20 ກຸມພາ 2018 ຂໍ້ຫາມີຢາເສບຕິດໄວ້ໃນຄອບຄອງຈຳນວນ 40 ເມັດ ,ນ້ຳໜັກ 3,7 ກຣາມ.


ທ້າວ ເຟືອງ ອາຍຸ 46 ປີ; ອາຊີບເຮັດສວນ, ຢູ່ບ້ານ ຄຳ ເມືອງ ປາກແບງ ແຂວງອຸດົມໄຊ (ຈຳເລີຍ02),ຖືກກັກຕົວໃນຄັ້ງວັນທີ 14 ມັງກອນ 2018 ໃນຂໍ້ຫາ ມີຢາເສບຕິດປະເພດຢາບ້າໄວ້ໃນຄອບຄອງ ຈຳນວນ 01 ຖົງ ເທົ່າກັບ 169 ເມັດ ,ນ້ຳໜັກ 15,8 ກຣາມ. ຄະນະສານອາຍາຂັ້ນຕົ້ນ ແຂວງອຸດົມໄຊ ລົງໂທດອິດສະລະພາບ ທ້າວ ທຸລະນີ(ຫຼ້າ) ແບງຕະນະ(ຈຳເລີຍ01) ຫ້າປີ ,ປັບໃໝ 10.000.000 ກີບ; ລົງໂທດອິດສະລະພາບ ທ້າວ ເຟືອງ (ຈຳເລີຍ02) ຫ້າປີ ພ້ອມທັງປັບໃໝ 10.000.000 ກີບ; ຮິບຢາເສບຕິດຈຳນວນດັ່ງກ່າວມາທໍຳລາຍຖິ້ມ, ຮິບລົດຈັກຍີ່ຫໍ້ຈົງເຊິນ ສີດຳ (ບໍ່ມີທະບຽນ)ຂອງທ້າວ ທຸລະນີ(ຫຼ້າ) ແບງຕະນະມາເປັນຂອງລັດ ແລະ ສົ່ງລົດຈັກຍີ່ຫໍ້ (ຫົງຊິນ)ໃຫ້ທ້າວ ເຟືອງ (ຈຳເລີຍ02).




ພາບ-ຂ່າວ: ສທ ພອນສະຫວັດ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.