Header Ads

ເຈົ້າໜ້າທີ່ກັກຕົວພວກຄ້າຂາຍສິ່ງເສບຕິດ ພ້ອມຂອງກາງ 2 ແສນເມັດ ເຂດເມືອງເຊໂປນ ແຂວງສະຫວັນນະເຂດ





ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງສະຫວັນນະເຂດ ໄດ້ສົມທົບກັບເຈົ້າໜ້າທີ່ວິຊາສະເພາະແຂວງກວາງຈິ ແຫ່ງ ສສ ຫວຽດນາມ ໄດ້ສືບຮູ້ ແລະ ຕິດຕາມເປົ້າໝາຍກຸ່ມຄົນບໍ່ດີຈໍານວນໜຶ່ງທີ່ກຳລັງເຄື່ອນໄຫວຊື້ – ຂາຍຢາເສບຕິດປະເພດ ( ຢາບ້າ ) ຢູ່ຕາມເສັ້ນທາງເລກ 09 ຂອບເຂດເມືອງເຊໂປນ ແຂວງສະຫວັນນະເຂດ.



ເມື່ອຮູ້ຄືແນວນັ້ນ ມາຮອດວັນທີ 17 ກັນຍາ 2018 ຜ່ານມານີ້ ທາງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງ ຈຶ່ງໄດ້ຈັດກຳລັງປະສານສົມທົບກັບເຈົ້າໜ້າທີ່ຈຸດກວດກາສາລາກາຍບາງ ເມືອງພີນ ແຂວງສະຫວັນນະເຂດ ຈົນຮອດເວລາປະມານ 13:50 ໂມງ ຂອງວັນດຽວກັນ ກໍ່ເຫັນລົດເປົ້າໝາຍກຳລັງມຸ່ງໜ້າມາຫາຈຸດກວດກາດັ່ງກ່າວ, ພໍມາຮອດຈຸດກວດກາເຈົ້າໜ້າທີ່ກໍ່ໄດ້ສະແດງຕົວກວດຄົ້ນ ແລະ ກັກຕົວພວກດັ່ງກ່າວໄດ້ ຄື: ທ້າວ ທົງໄຊ ສິງທອງ ອາຍຸ 34 ປີ ອາຊີບເຮັດນາ ຢູ່ບ້ານໂນນສົມບູນ ແລະ ທ້າວ ລຳພອນ ອິນທະວົງ ອາຍຸ 42 ປີອາຊີບເຮັດນາ ຢູ່ບ້ານນາໜອງຜື ພວກກ່ຽວທັງສອງຢູ່ເມືອງສອງຄອນ ແຂວງສະຫວັນນະເຂດ ພ້ອມຂອງກາງຢາບ້າ 33 ແພັກ ກັບ 01 ມັດ ເທົ່າກັບ 2 ແສນເມັດ, ລົດໃຫຍ່ 01 ຄັນ, ໂທລະສັບ 02 ໜ່ວຍ ຈຶ່ງຢຶດໄວ້ເປັນຫຼັກຖານ.


ຜ່ານການສືບສວນ – ສອບສວນເບື້ອງຕົ້ນ ພວກກ່ຽວໃຫ້ການວ່າ: ຢາບ້າຈຳນວນດັ່ງກ່າວເປັນຂອງພວກກ່ຽວແທ້ ແລະ ໄດ້ຮັບມາຈາກຜູ້ຮ່ວມຂະບວນການ, ປັດຈຸບັນຄະດີດັ່ງກ່າວຍັງຢູ່ໃນຂັ້ນຕອນສືບສວນ – ສອບສວນຂະຫຍາຍຜົນຫາຜູ້ຮ່ວມຂະບວນການມາລົງໂທດຕາມລະບຽບກົດໝາຍບ້ານເມືອງ.

© ໂຕະນໍ້າຊາຂ່າວ |  www.tonamcha.com

_____


No comments

Powered by Blogger.