Header Ads

ທະນາຄານແຫ່ງສປປ ລາວ ເລັ່ງແກ້ໄຂບັນຫາທຸຈະລິດທີ່ເກີດກັບສະຖາບັນການເງິນຈຸລະພາກ ທີ່ຮັບຝາກເງິນ ເພື່ອການພັດທະນາ ຢູ່ບ້ານສົງເປືອຍໃຕ້




ອີງຕາມການລາຍງານຂອງ ວິທະຍຸກະຈາຍສຽງແຫ່ງຊາດ ວ່າ: ທະນາຄານແຫ່ງ ສປປ ລາວ (ທຫລ) ພວມດຳເນີນການຕາມລະບຽບກົດໝາຍຕໍ່ສະຖາບັນການເງິນຈຸລະພາກທີ່ຮັບຝາກເງິນ ເພື່ອການພັດທະນາ ຢູ່ບ້ານສົງເປືອຍໃຕ້, ເມືອງນາຊາຍທອງ, ນະຄອນຫຼວງວຽງຈັນ ທີ່ເກີດມີບັນຫາຂາດສະພາບຄ່ອງທາງດ້ານການເງິນ ເນື່ອງຈາກອະດີດປະທານສະພາບໍລິຫານສະຖາບັນການເງິນດັ່ງກ່າວ ໄດ້ຍັກຍອກເອົາເງິນຂອງປະຊາຊົນທີ່ມາຝາກເງິນນຳສະຖາບັນນີ້ໄປ ຈຳນວນສູງເຖິງ 19 ຕື້ກ່ວາກີບ.

ທ່ານ ສອນໄຊ ສິດພະໄຊ, ຮັກສາການຜູ້ວ່າການທະນາຄານແຫ່ງ ສປປ.ລາວ ໃຫ້ສຳພາດໃນໂອກາດເຂົ້າຮ່ວມກອງປະຊຸມລັດຖະບານເປີດກ້ວາງ ຄັ້ງທີ 2 ປີ 2018 ທີ່ຈັດຂຶ້ນລະຫວ່າງວັນທີ 17 ຫາ 18 ກັນຍານີ້ ວ່າ: ສະຖາບັນການເງິນແຫ່ງດັ່ງກ່າວ ໄດ້ຮັບການສ້າງຕັ້ງຂຶ້ນມາດົນສົມຄວນແລ້ວ ແລະ ໄດ້ຂຶ້ນທະບຽນຢ່າງຖືກຕ້ອງກັບທະນາຄານແຫ່ງ ສປປ ລາວ (ທຫລ). 



ໃນໄລຍະຜ່ານມາ ທຫລ ໄດ້ເຄື່ອນໄຫວກວດກາສະຖາບັນການເງິນດັ່ງກ່າວ ປີລະຄັ້ງ, ແຕ່ເປັນການກວດກາຕາມເອກະສານ ໂດຍບໍ່ໄດ້ລົງເລິກຕາມຄວາມເປັນຈິງ ຈຶ່ງເຮັດໃຫ້ຂໍ້ມູນບາງຢ່າງຜິດພາດ ຫລື ຄາດເຄື່ອນໄປ. ປັດຈຸບັນ ທາງ ທຫລ ພວມດໍາເນີນການໄປຕາມຂັ້ນຕອນຂອງຂະບວນ ການຍຸຕິທໍາຕໍ່ສະຖາບັນການເງິນແຫ່ງນີ້ ເພື່ອໃຫ້ອະດີດຜູ້ບໍລິຫານສະຖາບັນການເງິນດັ່ງກ່າວທີ່ນຳເອົາເງິນໄປໃຊ້ບໍ່ຖືກຕາມວັດຖຸປະສົງນັ້ນ ມາສົ່ງຄືນໃຫ້ປະຊາຊົນທີ່ມາຝາກເງິນນຳສະຖາບັນໂດຍໄວ ແລະ ທັງເພື່ອໃຫ້ສະພາບໍລິຫານສະຖາບັນ ມີຄວາມຮັບຜິດຊອບຮ່ວມກັນ. 

ຈາກເຫດການທີ່ເກີດຂຶ້ນໃນຄັ້ງນີ້, ທະນາຄານແຫ່ງ ສປປ ລາວ ຈະຖືເປັນບົດຮຽນສຳຄັນ ແລະ ຈະໄດ້ເພີ່ມທະວີຄວາມເອົາໃຈໃສ່ ໃນການຄຸ້ມຄອງກວດກາບັນດາສະຖາບັນການເງິນຈຸລະພາກໃນທົ່ວປະເທດໃຫ້ເຂັ້ມງວດກ່ວາເກົ່າ.



ອີງຕາມແຫລງ່ຂ່າວຈາກ ທຫລ ໃຫ້ຮູ້ວ່າ: ສະຖາບັນການເງິນຈຸລະພາກທີ່ຮັບຝາກເງິນ ເພື່ອການພັດທະນາ ຢູ່ບ້ານສົງເປືອຍໃຕ້, ເມືອງນາຊາຍທອງ, ນະຄອນຫຼວງວຽງຈັນ ເກີດບັນຫາຂາດສະພາບຄ່ອງທາງດ້ານການເງິນ ເນື່ອງຈາກ ທ້າວ ສົມຈິດ ບຸນເຫຼື່ອມ ອະດີດປະທານສະພາບໍລິຫານສະຖາບັນການເງິນດັ່ງກ່າວ ໄດ້ຍັກຍອກເອົາເງິນຂອງສະຖາບັນ ຈຳນວນ 19 ຕື້ກ່ວາ ກີບ ໂດຍການບັນທຶກເປັນ 2 ບັນຊີ ຊຶ່ງບັນຊີທີ 1 ໄດ້ລາຍງານຖານະການເງິນໃຫ້ ທຫລ, ສ່ວນບັນຊີທີ 2 ແມ່ນເຊື່ອງອໍາຂໍ້ມູນຕົວຈິງເພື່ອໃຊ້ພາຍໃນສະຖາບັນ ເຮັດໃຫ້ຄະນະກວດກາ ທຫລ ບໍ່ສາມາດກວດເຫັນຖານະການເງິນທີ່ແທ້ຈິງຂອງສະຖາບັນການເງິນໄດ້; ຕໍ່ມາ ຄະນະກວດກາໄດ້ສືບຕໍ່ລົງຕິດຕາມກວດກາໃນລະຫວ່າງວັນທີ 12–23 ມີນາ 2018 ຈຶ່ງສາມາດເກັບກໍາຂໍ້ມູນຕົວເລກຖານະການເງິນທີ່ແທ້ຈິງໄດ້. ຜ່ານການລົງເຄື່ອນໄຫວສືບສວນສອບສວນຕົວຈິງຂອງຄະນະກວດກາ, ໄດ້ນຳໄປສູ່ການຍອມຮັບສາລະພາບຂອງທ້າວ ສົມຈິດ ບຸນເຫຼື່ອມ ທີ່ໄດ້ເປີດເຜີຍວ່າຕົນເອງ ແມ່ນໄດ້ຍັກຍອກເອົາເງິນຈຳນວນ 19 ຕື້ກວ່າກີບໄປແທ້. ຕໍ່ກັບບັນຫາດັ່ງກ່າວ ກົມຄຸ້ມຄອງສະຖາບັນການເງິນ ໄດ້ລາຍງານໄປຍັງເຈົ້າໜ້າທີ່ຕຳຫຼວດເສດຖະກິດ ແລະ ເຂົ້າປຶກສາຫາລືກັບພາກສ່ວນດັ່ງກ່າວ ເພື່ອດຳເນີນຄະດີກັບທ້າວ ສົມຈິດ ບຸນເຫຼື່ອມ ຕາມລະບຽບກົດໝາຍ. ພ້ອມກັນນັ້ນ ກໍ່ໄດ້ແນະນໍາໃຫ້ດຳເນີນການປັບປຸງໂຄງຮ່າງການຈັດຕັ້ງ, ແລະ ແຕ່ງຕັ້ງຄະນະຜູ້ບໍລິຫານສະຖາບັນການເງິນຈຸລະພາກທີ່ຮັບຝາກເງິນ ເພື່ອການພັດທະນາ ຊຸດໃໝ່ ເພື່ອມາບໍລິຫານ ໂດຍໃຫ້ເພີ່ມທຶນ ຫຼື ຊອກຫາຂາຫຸ້ນໃໝ່ມາຮ່ວມທຶນ, ເລັ່ງເກັບກູ້ໜີ້ສິນທີ່ໄດ້ປ່ອຍໄປນັ້ນຄືນ ແລະ ຫາວິທີເກັບກູ້ເອົາເງິນທີ່ຖືກຍັກຍອກໄປ ມາຄືນໃຫ້ຄົບ.

ພາບ ແລະ ຂ່າວ: ບຸນຕຽງ ຈັນທະວົງ 
© ໂຕະນໍ້າຊາຂ່າວ |  www.tonamcha.com
_____

No comments

Powered by Blogger.