Header Ads

ຮອງນາຍົກລັດຖະມົນຕີລົງຕິດຕາມຄວາມຄືບໜ້າການຊ່ວຍເຫຼືອຜູ້ປະສົບໄພຢູ່ເມືອງສະຫນາມໄຊ ແຂວງອັດຕະປື



ໃນວັນທີ 7 ກັນຍາ 2018, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ເດີນທາງລົງໄປເຄື່ອນຢ້ຽມຢາມ ແລະ ເຮັດວຽກ ຢູ່ເມືອງສະໜາມໄຊ ແຂວງອັດຕະປື ເພື່ອຊີ້ນໍາການເອົາໃຈໃສ່ຊ່ວຍເຫລືອປະຊາຊົນທີ່ຖືກຜົນກະທົບໄພນໍ້າຖ້ວມ ແລະ ຮັບຟັງລາຍງານຄວາມຄືບໜ້າ, ໂດຍໄດ້ຮັບຟັງການລາຍງານຈາກທ່ານ ບຸນໂຮມ ພົມມະສານ ເຈົ້າເມືອງ ເມືອງສະຫນາມໄຊ





ຈາກນັ້ນ ທ່ານຮອງນາຍົກລັດຖະມົນຕີ ກໍ່ໄດ້ກ່າວສະແດງຄວາມຊົມເຊີຍຕໍ່ອໍານາດການປົກຄອງແຂວງ ແລະ ເມືອງ ກໍ່ຄື ຄະນະສະເພາະກິດແກ້ໄຂໄພພິບັດຂັ້ນແຂວງ ແລະ ເມືອງ ທີ່ໄດ້ເອົາໃຈໃສ່ແກ້ໄຂໜ້າວຽກຕ່າງໆ ໂດຍມີຄວາມຄືບໜ້າດີ, ໂດຍສະເພາະ ສິ່ງທີ່ສຳຄັນ ກໍ່ແມ່ນການຊັບຊ້ອນບ່ອນທີ່ຢູ່ອາໃສໃຫ້ປະຊາຊົນໃນແຕ່ລະສູນພັກຊົວຄາວຢ່າງເປັນລະບົບ.

ໃນຂະນະດຽວກັນ, ທ່ານ ສອນໄຊ ສີພັນດອນ ຍັງໄດ້ຊີ້ນຳໃຫ້ສືບຕໍ່ການຈັດສັນຍົກຍ້າຍປະຊາຊົນທີ່ມີຫນ້າຂອງບ້ານທີ່ຍັງຄົງຄ້າງການອອກບັດນັ້ນ ໃຫ້ໄດ້ຂຶ້ນບັນຊີ ຂຶ້ນສໍາມະໂນຄົວໃຫ້ຈະແຈ້ງໂດຍໄວ. ພ້ອມນັ້ນ ກໍ່ໃຫ້ຂຶ້ນບັນຊີໃຫ້ຊັດເຈນກ່ຽວກັບບ້ານໃດທີ່ຖືກຜົນກະທົບໂດຍໃຫ້ແຍກບ້ານໃດມີສະຖານະການໜັກ, ກາງແລະ ເບົາ ໂດຍໃຫ້ເຫັນຕົວເລກຊັດເຈນລະອຽດ; ການກະທົບນັ້ນມີຫຍັງແດ່ເປັນຕົ້ນ: ເຮືອນຊານ,ທົ່ງນາ, ສັດລ້ຽງ ແລະ ອື່ນໆ.



ນອກຈາກນັ້ນ, ກໍ່ໃຫ້ສືບຕໍ່ດຳເນີນການເປີດການຮຽນ-ການສອນ ໂດຍໃຫ້ສູມໃສ່ ມ4, ມ7 ກ່ອນ, ໂດຍອັນສໍາຄັນແມ່ນໃຫ້ເນັ້ນໃສ່ສະຖານທີ່ຮຽນ, ລວມທັງ ອຸປະກອນການຮຽນທີ່ມີຄວາມຈໍາເປັນເຊັ່ນ: ເຄື່ອງນຸ່ງນັກຮຽນ, ເກີບ, ປື້ມ, ກະເປົ່າ ແລະ ອື່ນໆ, ຄຽງຄູ່ກັບການຂຶ້ນບັນຊີເກັບກໍາຈໍານວນນັກຮຽນໃຫ້ລະອຽດຊັດເຈນ, ໂດຍຜ່ານການປະຊາສໍາພັນເປັນຢ່າງດີ. 

ພ້ອມນີ້, ບັນດາສູນທີ່ຢູ່ໃນແຕ່ລະຈຸດນັ້ນ ກໍ່ໃຫ້ສືບຕໍ່ເອົາໃຈໃສ່ວຽກງານການບໍລິການຮັກສາສຸຂະພາບໃຫ້ແກ່ປະຊາຊົນຢ່າງທົ່ວເຖິງ, ໂດຍໃຫ້ມີການພັດປ່ຽນກັນເປັນປະຈໍາ. ສ່ວນການຈັດກິດຈະກໍາຕ່າງໆຢູ່ໃນສູນພັກຊົ່ວຄາວ, ກໍ່ໃຫ້ສືບຕໍ່ເຮັດທີ່ຢູ່ໃນແຕ່ລະຈຸດ; ແຕ່ລະສູນ ໃຫ້ມີການລະດົມແນວຄິດຈິດໃຈໃຫ້ກໍາລັງໃຈແກ່ປະຊາຊົນຜູ້ປະສົບໄພຢ່າງຕໍ່ເນື່ອງ. 





ອີກປະການຫນຶ່ງ, ສຳລັບສະຖານທີ່ຖີ້ມຂີ້ເຫຍື້ອ ກໍ່ໃຫ້ເອົາໃຈໃສ່ເພາະມັນອາດກໍ່ໃຫ້ເກີດພະຍາດຕາມມາໄດ້. ຕໍ່ກັບວຽກງານການຕິດຕັ້ງໂທລະໂຄງຢູ່ໃນແຕ່ລະຈຸດ ແຕ່ລະສູນພັກຊົວຄາວນັ້ນ, ກໍ່ໃຫ້ສືບຕໍ່ໄປຕິດຕັ້ງໃຫ້ສໍາເລັດໂດຍໄວ ເພື່ອຈະໄດ້ໂຄສະນາເຜີຍແຜ່ໃຫ້ປະຊາຊົນໄດ້ຮັບຮູ້ຂໍ້ມູນຂ່າວສານ ຮັບຮູ້ໄດ້ສະພາບການຕ່າງໆ ກໍ່ຄື ວຽກງານການຊ່ວຍເຫລືອຜູ້ປະສົບໄພຢູ່ເມືອງສະໜາມໄຊ. ພ້ອມນີ້ພະແນກສາທາລະນະສຸກ, ແລະ ຂະແໜງໂຍທາທິການກໍ່ໃຫ້ສືບຕໍ່ວຽກການຈັນສັນບ້ານທີ່ຈະໄປຕັ່ງເປັນສູນພັກຊົວຄາວ, ຄຽງຄູ່ໄປກັບການຕິດຕັ້ງລະບົບການຮັກສາຄວາມສະອາດ, ເຊິ່ງຕ້ອງໄດ້ຄົ້ນຄວ້າໂດຍໄວ ໂດຍປະສານສົມທົບກັບທາງແຂວງ, ເມືອງ ແລະ ພະແນກການທີ່ກ່ຽວຂ້ອງ ດ້ວຍຄວາມເປັນເຈົ້າການ. 

ສ່ວນຕໍ່ໄປ ໃນການເບີກຈ່າຍເຄື່ອງໃຫ້ຜູ້ປະສົບໄພ, ກໍ່ຢາກໃຫ້ມີບັນຊີຕົວເລກລະອຽດຊັດເຈນຂອງແຕ່ລະບຸກຄົນ, ແຕ່ລະຄອບຄົວ ເພື່ອບໍ່ໃຫ້ເກີດຄວາມສັບສົນວ່າຜູ້ໃດໄດ້, ຫຼືບໍ່ໄດ້, ກໍ່ຄື ການເບີກຈ່າຍເງິນ 1 ແສນກີບ ໃຫ້ບຸກຄົນນັ້ນ ກໍ່ໃຫ້ມີບັນຊີຢ່າງລະອຽດຊັດເຈນ ແລະ ອື່ນໆ.


ພາບ - ຂ່າວ: ວສລ 
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.