Header Ads

1 ປີ ປກສ ຈຳປາສັກ ກັກຕົວຜູ້ຕ້ອງຫາໄດ້ 950 ຄົນ ຢຶດຂອງກາງ ສິ່ງເສບຕິດໄດ້ 361.966 ເມັດ



ອີງຕາມການລາຍງານຂອງ ນສພ ຈຳປາໃຫ່ມໃຫ້ຮູ້ວ່າ ທ່ານ ພັນໂທ ສຸກັນ ໄຕໄຊຍະວົງ ຮອງຫົວໜ້າກອງບັນຊາການ ປກສ ແຂວງຈໍາປາສັກ ລາຍງານວ່າ: ໃນປີ 2017 ແລະ 6 ເດືອນ ປີ 2018 ທົ່ວແຂວງຈໍາປາສັກ ສາມາດແກ້ໄຂ ແລະ ມ້າງຄະດີຢາເສບຕິດໄດ້ທັງໝົດ 492 ລາຍ(ຄະດີຢາເສບຕິດທີ່ພົ້ນເດັ່ນ ແລະ ຕິດພັນກັບອາວຸດເສິກ 21 ລາຍ), ກັກຕົວຜູ້ຕ້ອງຫາໄດ້ 950 ຄົນ, ຍິງ 97 ຄົນ, ຕ່າງປະເທດ 23 ຄົນ, ຍິງ 9 ຄົນ, ໃນນັ້ນ ຫວຽດນາມ 19 ຄົນ, ຍິງ 8 ຄົນ, ກໍາປູເຈຍ 2 ຄົນ, ຍິງ 1 ຄົນ ແລະ ໄທ 1 ຄົນ; ຢຶດຂອງກາງ ຢາບ້າ ໄດ້ 361.966 ເມັດ, ຢາໄອ໊ສ໌ 11 ກິໂລກຼາມ ກັບ 300 ກຼາມ, ຄັນຊາບົດ 500 ກຼາມ, ລົດໃຫຍ່ 36 ຄັນ, ລົດຈັກ 234 ຄັນ ແລະ ໂທລະສັບ 696 ໜ່ວຍ. ປະເພດອາວຸດເສິກ ມີ 12 ກະບອກ, ລູກປືນ 170 ລູກ ແລະ ໝາກແຕກ 1 ໜ່ວຍ; ປະເພດອາວຸດດັດແປງ ມີ 9 ກະບອກ, ລູກປືນແວງ 33 ລູກ ແລະ ອຸປະກອນປືນດັດແປງ 4 ອັນ; ປະເພດອາວຸດປືນລ່າເນື້ອ ປືນແກັບ 7 ກະບອກ, ປືນບິກ 3 ກະບອກ, ນອກນີ້ ຍັງມີ ປະເພດວັດຖຸມີຄ່າ ແລະ ເອກະສານອື່ນໆອີກ.

ຂໍ້ມູນດັ່ງກ່າວນີ້ ຖືກເປີດເຜີຍໃນວັນທີ 12 ຕຸລາ 2018, ໃນໂອກາດທີ່ແຂວງຈໍາປາສັກ ໄດ້ຈັດພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 17 ປີ(12/10/2001-12/10/2018) ເຊິ່ງພິທີຈັດຂຶ້ນຢູ່ຫໍວັດທະນະທໍາບັນດາເຜົ່າ ຫຼັກ 7 ນະຄອນປາກເຊ ໂດຍການເຂົ້າຮ່ວມຂອງທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ປະທານຄະນະກໍາມະການກວດກາ ແລະ ຄວບຄຸມຢາເສບຕິດ(ກຄສ) ຂັ້ນແຂວງ, ທ່ານ ພົນຈັດຕະວາ ສີພັນ ວົງເຮືອງຄໍາ ຄະນະປະຈໍາພັກແຂວງ ຫົວໜ້າກອງບັນຊາການ ປກສ ແຂວງ, ທ່ານ ສຸລິວັນ ສະຫວັດທະສິນ ຄະນະປະຈໍາພັກແຂວງ ເຈົ້ານະຄອນປາກເຊ. ມີການນໍາຂົງເຂດປົກປ້ອງກົດໝາຍ, ພະເຖລານຸເຖລະ ພ້ອມດ້ວຍການນໍາຈາກພາກສ່ວນກ່ຽວຂ້ອງຂອງແຂວງ, ການນໍາເມືອງ, ນັກທຸລະກິດ, ຜູ້ປະກອບການ, ພະນັກງານນັກຮົບຖັນແຖວກໍາລັງປະກອບອາວຸດ, ຄູ, ອາຈານ ແລະ ນັກຮຽນ-ນັກສຶກສາ ຈາກສະຖາບັນການສຶກສາ ແລະ ໂຮງຮຽນສາມັນຕ່າງໆເຂົ້າຮ່ວມ.

ສ່ວນວຽກງານການດໍາເນີນຄະດີ, ສໍານວນ-ສໍາເນົາ ແລະ ສັ່ງຟ້ອງ ນັ້ນ, ທ່ານ ພັນໂທ ສຸກັນ ໄຕໄຊຍະວົງ ຮອງຫົວໜ້າກອງບັນຊາການ ປກສ ແຂວງ ໃຫ້ຮູ້ວ່າ: ໃນປີ 2017 ແລະ 6 ເດືອນ ປີ 2018 ໄດ້ສະຫຼຸບຄະດີຢາເສບຕິດ ສົ່ງໃຫ້ອົງການໄອຍະການປະຊາຊົນແຂວງ ທັງໝົດ 545 ລາຍ, ມີຜູ້ຕ້ອງຫາ 754 ຄົນ, ຍິງ 110 ຄົນ, ຕ່າງປະເທດ 15 ຄົນ, ຍິງ 9 ຄົນ, ໃນນັ້ນ ຫວຽດນາມ 12 ຄົນ, ຍິງ 8 ຄົນ, ໄທ 2 ຄົນ ແລະ ກໍາປູເຈຍ 1 ຄົນ(ຍິງ); ຄະດີຢາເສບຕິດທີ່ສານຕັດສິນແລ້ວ ມີ 265 ລາຍ, ມີ 404 ຄົນ, ຍິງ 45 ຄົນ, ຕ່າງປະເທດ 5 ຄົນ, ໃນນັ້ນ ຫວຽດນາມ 4 ຄົນ, ໄທ 1 ຄົນ, ເຄື່ອງຂອງກາງຄະດີຢາເສບຕິດ ທີ່ສານຕັດສິນແລ້ວ ມີຢາບ້າ 181.214 ເມັດ ເທົ່າກັບ 16 ກິໂລກຼາມ ກັບ 407 ກຼາມ, ຢາໄອ໊ສ໌ 131,16 ກຼາມ.

ຕໍ່ກັບບັນຫາດັ່ງກ່າວທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ປະທານ ກຄສ ຂັ້ນແຂວງ ກໍ່ໄດ້ໃຫ້ກຽດມີຄໍາເຫັນ, ທ່ານ ກ່າວວ່າ: ບັນຫາການລັກລອບຄ້າ-ຂາຍຢາເສບຕິດ ໃນສັງຄົມປັດຈຸບັນ ມັນໄດ້ເປັນໄພຂົ່ມຂູ່ທີ່ອັນຕະລາຍຮ້າຍແຮງຕໍ່ຄວາມໝັ້ນຄົງ, ຕໍ່ສະຖຽນລະພາບທາງດ້ານການເມືອງ, ເສດຖະກິດ ແລະ ສັງຄົມຂອງຊາດ ກໍ່ຄືຂອງແຂວງຈໍາປາສັກ, ຍ້ອນຜົນສະທ້ອນດັ່ງກ່າວ ໃນນາມຕາງໜ້າອໍານາດການປົກຄອງແຂວງ ແລະ ໃນນາມສ່ວນຕົວ ຂໍຮຽກຮ້ອງໃຫ້ອໍານາດການປົກຄອງທຸກຂັ້ນ, ທຸກພາກສ່ວນ ແລະ ທຸກອົງການຈັດຕັ້ງໃນສັງຄົມ ຕະຫຼອດຮອດພໍ່ແມ່ປະຊາຊົນ ຕ້ອງເພີ່ມທະວີເອົາໃຈໃສ່ສຶກສາອົບຮົມຊາວໜຸ່ມ-ໄວໜຸ່ມ ແລະ ເຍົາວະຊົນ ໃຫ້ຮັບຮູ້ເຂົ້າໃຈ, ເຫັນໄດ້ເຖິງຜົນຮ້າຍຂອງຢາເສບຕິດ, ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງ ເພື່ອປ້ອງກັນບໍ່ໃຫ້ທຸກຄົນຕົກເປັນທາດຂອງຢາເສບຕິດ; ເອົາໃຈໃສ່ບໍາບັດປິ່ນປົວ, ຟື້ນຟູສຸຂະພາບ ແລະ ຝຶກວິຊາຊີບ ໃຫ້ຜູ້ທີ່ຕິດຢາເສບຕິດ ໃຫ້ມີສຸຂະພາບແຂງແຮງ ທັງດ້ານຮ່າງກາຍ-ຈິດໃຈ ເພື່ອໃຫ້ກັບຄືນເປັນຄົນດີຂອງສັງຄົມ; ນອກນີ້ ກໍ່ຕ້ອງນໍາໃຊ້ມາດຕະການທາງກົດໝາຍຢ່າງເດັດຂາດ ແລະ ເຂັ້ມງວດ ຕໍ່ຜູ້ຝ່າຝືນລະບຽບກົດໝາຍ ກໍ່ຄືຕໍ່ຜູ້ລັກລອບຄ້າ-ຂາຍຢາເສບຕິດ, ຄຽງຄູ່ກັນນັ້ນ ກໍ່ຕ້ອງເອົາໃຈໃສ່ເພີ່ມທະວີການພົວພັນຮ່ວມມືກັບສາກົນ ແລະ ປະເທດໃກ້ຄຽງທີ່ມີຊາຍແດນຕິດຈອດກັນຢ່າງຈິງຈັງ ເພື່ອຮ່ວມກັນຄວບຄຸມ, ຕ້ານ ແລະ ສະກັດກັ້ນທຸກການເຄື່ອນໄຫວແຜ່ລາມຂອງຢາເສບຕິດ ໃຫ້ຫຼຸດໜ້ອຍຖອຍລົງ ເຮັດໃຫ້ແຂວງຈໍາປາສັກ ເປັນຂົງເຂດປອດຢາເສບຕິດໃນຕໍ່ໜ້າ.


ຂ່າວ-ພາບ: ທູນທອງໃຈ 
© ໂຕະນໍ້າຊາຂ່າວ |  www.tonamchanews.com
_____


No comments

Powered by Blogger.