Header Ads

ກະຊວງການຕ່າງປະເທດ ປາຖະກະຖາເລົ່າມູນເຊື້ອ 73 ປີ ວັນການທູດລາວ ແລະ ມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ




ໃນວັນທີ 05 ຕຸລາ 2018, ກະຊວງການຕ່າງປະເທດ ໄດ້ຈັດປາຖະກະຖາເລົ່າມູນເຊື້ອ ເນື່ອງໃນໂອກາດວັນການທູດລາວ ຄົບຮອບ 73 ປີ (12 ຕຸລາ 1945 – 12 ຕຸລາ 2018) ແລະ ພິທີມອບ-ຮັບ ໃນຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ, ໂດຍການໃຫ້ກຽດເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການຕ່າງປະເທດ. ມີບັນດາຄະນະພັກ, ຄະນະນໍາ, ສະມາຊິກ, ພະນັກງານ ອ້ອມຂ້າງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.



ໃນພິທີ ໄດ້ຮັບຟັງບົດລາຍງານການເມືອງ ແລະ ທິດທາງແຜນການກໍ່ສ້າງໃນຕໍ່ໜ້າຂອງ ໜ່ວຍພັກກົມອາຊຽນ ແລະ ໜ່ວຍພັກສະຖາບັນການຕ່າງປະເທດ, ຊຶ່ງການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ແມ່ນຄວາມຮຽກຮ້ອງຕ້ອງການທີ່ຈໍາເປັນພາວະວິໄສ, ສ່ອງແສງໃຫ້ເຫັນເຖິງການຄົງຕົວ ແລະ ການຂະຫຍາຍຕົວຂອງພັກປະຊາຊົນປະຕິວັດລາວ, ເຊີດຊູບົດບາດການຊີ້ນໍາ-ນໍາພາຂອງພັກໃຫ້ມີຜົນສັກສິດ ແລະ ທັງເປັນການເພີ່ມທະວີບົດບາດກໍາລັງແຮງໃຫ້ແກ່ການສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນໃນຕໍ່ໜ້າ. ພ້ອມກັນນີ້, ເພື່ອຍົກສູງຄູນນະພາບການປັບປຸງກໍ່ສ້າງຮາກຖານພັກ, ເພີ່ມທະວີໃນການຊີ້ນໍາ-ນໍາພາໃຫ້ບັນດາໜ່ວຍພັກເຄື່ອນໄຫວຕາມພາລະບົດບາດ, ສິດ, ໜ້າທີ່ການເມືອງຂອງຕົນ ແລະ ກໍ່ສ້າງໃຫ້ມີຄວາມເຂັ້ມແຂງທາງດ້ານການເມືອງແນວຄິດ, ດ້ານການຈັດຕັ້ງ ແລະ ແບບແຜນການນໍາພາດ້ານວຽກງານວິຊາສະເພາະ ລວມທັງອົງການຈັດຕັ້ງມະຫາຊົນ, ຮູ້ນໍາພາວຽກງານປ້ອງກັນພັກ-ພະນັກງານ ໃຫ້ມີຄວາມສະຫງົບຮຽບຮ້ອຍ, ນໍາພາປັບປຸງກໍ່ສ້າງຂະຫຍາຍສະມາຊິກພັກ, ພະນັກງານ ໃຫ້ມີການພັດທະນາຕົນຢ່າງຕໍ່ເນື່ອງ. ຈາກນັ້ນ, ສະຫາຍ ສະເຫຼີໄຊ ກົມມະສິດ ໄດ້ໃຫ້ກຽດຂຶ້ນມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ໃຫ້ແກ່ ໜ່ວຍພັກກົມອາຊຽນ ແລະ ໜ່ວຍພັກສະຖາບັນການຕ່າງປະເທດ. ພ້ອມນີ້, ສະຫາຍ ສະເຫຼີໄຊ ກົມມະສິດ ກໍໄດ້ໃຫ້ກຽດໂອ້ລົມ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ໜ່ວຍພັກທີ່ໄດ້ເອົາໃຈໃສ່ປັບປຸງກໍ່ສ້າງໜ່ວຍພັກຕົນຈົນໄດ້ຮັບນາມມະຍົດເຂັ້ມແຂງ-ຮູ້ນໍາພາຮອບດ້ານໃນຄັ້ງນີ້ ແລະ ເນັ້ນໃຫ້ສືບຕໍ່ຮັກສາມູນເຊື້ອ, ພ້ອມທັງຊີ້ນໍາໃຫ້ບັນດາໜ່ວຍພັກອ້ອມຂ້າງກະຊວງໃຫ້ເອົາໃຈໃສ່ສືບຕໍ່ປັບປຸງກໍ່ສ້າງໜ່ວຍພັກຕົນ ເພື່ອເພີ່ມທະວີສຸມໃສ່ການກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນຕາມທິດຂອງພັກເຮົາໃນຕໍ່ໜ້າ.



ໃນໂອກາດດຽວກັນນີ້, ສະຫາຍ ສະເຫຼີມໄຊ ກົມມະສິດ ກໍໄດ້ປາຖະກະຖາເລົ່າມູນເຊື້ອ 73 ປີ ແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງການທູດລາວ ແລະ ຜ່ານບົດລາຍງານຜົນສໍາເລັດຂອງການເຄື່ອນໄຫວວຽກງານການຕ່າງປະເທດລາວ ໃນໄລຍະ 1 ປີ ຜ່ານມາ.​ ສະຫາຍ ສະເຫຼີມໄຊ ກົມມະສິດ ໄດ້ຍົກໃຫ້ເຫັນຜົນສໍາເລັດອັນໃຫຍ່ຫລວງຂອງການເຄື່ອນໄຫວວຽກງານການທູດລາວ, ໂດຍການປະຕິບັດນະໂຍບາຍການຕ່າງປະເທດ “ສັນຕິພາບ, ເອກະລາດ, ມິດຕະພາບ ແລະ ການຮ່ວມມືແບບສະເໜີຕົ້ນສະເໝີປາຍ”, ບົນພື້ນຖານບັນດາຫຼັກການ ເຄົາລົບເອກະລາດ, ອະທິປະໄຕຂອງກັນ, ບໍ່ແຊກແຊງເຂົ້າວຽກງານພາຍໃນຂອງກັນ, ສະເໜີພາບ ແລະ ຕ່າງຝ່າຍຕ່າງມີຜົນປະໂຫຍດ, ຊຶ່ງເຫັນໄດ້ຈາກ ສປປ ລາວ ມີຖານະບົດບາດໃນເວທີພາກພື້ນ ແລະ ສາກົນ ທີ່ນັບມື້ນັບພົ້ນເດັ່ນຂຶ້ນ ທັງໃນກອບສອງຝ່າຍ ແລະ ກອບຫຼາຍຝ່າຍ, ມີເພື່ອນມິດສະຫາຍຢ່າງກວ້າງຂວາງ, ຫລາຍປະເທດມີຄວາມສົນໃຈມາລົງທຶນໃນລາວ ນັບມື້ນັບຫຼາຍຂຶ້ນ ແລະ ບັນດານັກທ່ອງທ່ຽວຕ່າງປະເທດ ກໍມີຈໍານວນເພີ່ມຂຶ້ນໃນແຕ່ລະປີ. ຮອດປະຈຸບັນ ສປປ ລາວ ໄດ້ສ້າງຕັ້ງສາຍພົວພັນການທູດກັບ 141 ປະເທດ, ມີສໍານັກງານຕາງໜ້າການທູດລາວຢູ່ຕ່າງປະເທດ 39 ແຫ່ງ, ໃນນີ້ ມີສະຖານເອກອັກຄະລັດຖະທູດ 26 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສູນໃຫຍ່ 9 ແຫ່ງ ແລະ ຫ້ອງການກົງສູນ 1 ແຫ່ງ.


ເພື່ອເປັນການຂໍ່ານັບຮັບຕ້ອນວັນການທູດລາວທີ່ຈະມາເຖິງນີ້, ກະຊວງການຕ່າງປະເທດ ຍັງມີກິດຈະກໍາເຂົ້າຢ້ຽມຊົມຫ້ອງມູນເຊື້ອຂອງກະຊວງການຕ່າງປະເທດ ແລະ ກິດຈະກໍາອື່ນໆ, ຊຶ່ງເປັນການລະນຶກເຖິງຜົນງານອັນໃຫຍ່ຫຼວງດ້ານວຽກງານການຕ່າງປະເທດ ທີ່ປະເທດຊາດຍາດມາໄດ້ໃນ 73 ປີ ຜ່ານມາ ແລະ ເພື່ອຊຸກຍູ້ສົ່ງເສີມໃຫ້ນັກການທູດລາວ ກໍຄືພະນັກງານກະຊວງການຕ່າງປະເທດ ໄດ້ຮູ້ເລິກຊຶ້ງເຖິງຄວາມໝາຍຄວາມສໍາຄັນ ແລະ ຄວາມເປັນມາ ຂອງວັນການທູດລາວ.


ທີ່ມາ: ກະຊວງການຕ່າງປະເທດ
© ໂຕະນໍ້າຊາຂ່າວ |  www.tonamchanews.com
_____



No comments

Powered by Blogger.