Header Ads

ລັດຖະບານຈະຢຸດຕິການຄົ້ນຫາຜູ້ສູນຫາຍຈາກສັນເຂື່ອນກັນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກ ທີ່ແຂວງອັດຕະປື




ໃນວັນທີ 4 ຕຸລາ 2018, ທີ່ສຳນັກງານນາຍົກລັດຖະມົນຕີ ນະຄອນຫຼວງວຽງຈັນ, ກອງປະຊຸມຄະນະກຳມະການສະເພາະກິດແກ້ໄຂໄພພິບັດລະດັບຊາດ ຄັ້ງທີ 6 ໄດ້ ຈັດຂຶ້ນພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ. ບັນດາຜູ້ເຂົ້າຮ່ວມກອງປະຊຸມໄດ້ຮັບຟັງການສະຫລຸບຕີລາຄາຄືນສະພາບການແກ້ໄຂໄພພິບັດທີ່ເກີດຂຶ້ນທົ່ວປະເທດໃນໄລຍະຜ່ານມາ, ໂດຍຜ່ານການລາຍງານຂອງບັນດາກະຊວງ ແລະ ຂະແໜງການກ່ຽວຂ້ອງ.



 ພ້ອມນີ້, ກອງປະຊຸມກໍ່ຍັງໄດ້ຕີລາຄາຄືນສະພາບການຟື້ນຟູຊີວິດການເປັນຢູ່ຂອງປະຊາຊົນຜູ້ປະສົບອຸທົກກະໄພຢູ່ເມືອງ ສະໜາມໄຊ, ແຂວງ ອັດຕະປື, ໂດຍສະເພາະ ຄວາມຄືບໜ້າໃນການກໍ່ສ້າງສູນພັກຊົ່ວຄາວຢູ່ຈຸດຕ່າງໆ ແລະ ການແຈກຢາຍສະບຽງອາຫານໃຫ້ປະຊາຊົນຜູ້ປະສົບໄພ, ລວມເຖີງ ການຄົ້ນຄ້ວາກ່ຽວກັບການປະກອບຄະນະສະເພາະກິດໄປປະຈຳຢູ່ແຂວງ ອັດຕະປື ເພື່ອຊຸກຍູ້, ຕິດຕາມ ແລະ ຊ່ວຍເຫລືອການຈັດຕັ້ງປະຕິບັດວຽກງານຕ່າງໆ ເພື່ອຊ່ວຍເຫລືອປະຊາຊົນຜູ້ປະສົບອຸທົກກະໄພທີ່ເມືອງ ສະໜາມໄຊ ຈົນກ່ວາ ແຂວງອັດຕະປື ຈະສາມາດມີຄວາມເຂັ້ມແຂງດ້ວຍຕົນເອງໄດ້. 



ໃນກອງປະຊຸມຄັ້ງນີ້, ບັນດາຜູ້ເຂົ້າຮ່ວມທີ່ຕາງໜ້າມາຈາກທຸກຂະແໜງການທີ່ກ່ຽວຂ້ອງ ຍັງໄດ້ພ້ອມກັນຄົ້ນຄ້ວາປຶກສາຫາລື ກ່ຽວກັບຮ່າງບົດຖະແຫລງຂ່າວການປະກາດ, ການຢຸດຕິ, ແລະ ການຊອກຄົ້ນຫາຜູ້ສູນຫາຍຈາກສັນເຂື່ອນກັນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກຢູ່ເມືອງ ສະໜາມໄຊ, ແຂວງ ອັດຕະປື ເພື່ອໃຫ້ມີຄວາມສົມບູນທີ່ສຸດ; ຈາກນັ້ນ, ທ່ານປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດຈະຖະແຫລງຂ່າວຕໍ່ສື່ມວນຊົນຢ່າງເປັນທາງການໃນອີກບໍ່ດົນນີ້. ອີງຕາມຂໍ້ມູນໃນຮ່າງບົດຖະແຫລງຂ່າວດັ່ງກ່າວ ໃຫ້ຮູ້ວ່າ: ຂໍ້ມູນການສູນຫາຍຂອງປະຊາຊົນຜູ້ປະສົບໄພຢູ່ເມືອງ ສະໜາມໄຊ, ແຂວງອັດຕະປື, ໃນເບື້ອງຕົ້ນແມ່ນ 131 ຄົນ ແຕ່ຜ່ານການເຕົ້າໂຮມບ້ານ ແລະ ເກັບກຳສະຖິຕິຄືນໃໝ່ຂອງຄະນະກຳມະການກ່ຽວຂ້ອງ ເຫັນວ່າມີປະຊາຊົນ 66 ຄົນ ທີ່ໄປອາໃສຢູ່ບ່ອນອື່ນໃນໄລຍະເກີດເຫດ ແລະ ໄດ້ກັບຄືນມາແລ້ວ ຈິ່ງເຮັດໃຫ້ຕົວເລກຜູ້ສູນຫາຍຢ່າງເປັນທາງການແມ່ນ 65 ຄົນ, ໃນນີ້ ຄົ້ນພົບສົບຜູ້ເສຍຊີວິດແລ້ວ 34 ສົບ, ຈິ່ງເຮັດໃຫ້ຈຳນວນຜູ້ສູນຫາຍຕົວຈິງໃນປັດຈຸບັນ ຍັງເຫລືອ 31 ຄົນ. ນອກຈາກນີ້, ຍັງມີຜູ້ອົບພະຍົບຖືກບາດເຈັບໜັກຈາກໄພພິບັດນໍ້າຖ້ວມໃນຄັ້ງນີ້, ແລະ ມີຜູ້ເສຍຊີວິດຢູ່ໂຮງໝໍ ອີກ 6 ຄົນ. 







ດ້ວຍເຫດນີ້, ເມື່ອເອົາຕົວເລກຜູ້ເສຍຊີວິດຢູ່ໂຮງໝໍ 6 ຄົນ ມາລວມກັບ ຕົວເລກຜູ້ສູນ ຫາຍທີ່ເສຍຊີວິດ ແລະ ເກັບກູ້ສົບໄດ້ 34 ສົບ ຈິ່ງເຮັດໃຫ້ຈຳນວນຜູ້ເສຍຊີວິດ ລວມທັງໝົດ ແມ່ນ 40 ສົບ, ຍິງ 19 ສົບ. ໃນກອງປະຊຸມຄັ້ງນີ້, ທ່ານປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ ຍັງໄດ້ແຈ້ງຜົນຂອງກອງປະຊຸມນາຍົກ ແລະ ຮອງນາຍົກລັດຖະມົນຕີຄັ້ງທີ 2 ທີ່ຖືກຈັດຂຶ້ນເມື່ອບໍ່ດົນມານີ້, ເຊິ່ງໄດ້ມີການຕີລາຄາສູງ ແລະ ສະແດງຄວາມຍ້ອງຍໍຊົມເຊີຍຕໍ່ຄະນະກຳມະການສະເພາະກິດແກ້ໄຂໄພພິບັດລະດັບຊາດທີ່ໄດ້ເອົາໃຈໃສ່ປະຕິບັດຕາມການຊີ້ນຳຂອງກົມການເມືອງສູນກາງພັກ ແລະ ຕາມແຜນແກ້ໄຂໄພພິບັດຂອງລັດຖະບານ. ພ້ອມນີ້, ທ່ານຍັງໄດ້ເນັ້ນໜັກໃຫ້ຄະນະກຳມະການສະເພາະກິດແກ້ໄຂໄພພິບັດລະດັບຊາດຈົ່ງສືບຕໍ່ຈັດຕັ້ງປະຕິບັດຫລາຍວຽກງານສຳຄັນ, ໂດຍສະເພາະ ຢູ່ແຂວງ ອັດຕະປື, ແມ່ນຕ້ອງສືບຕໍ່ຟື້ນຟູຊີວິດການເປັນຢູ່ຂອງປະຊາຊົນຜູ້ປະສົບອຸທົກກະໄພທີ່ເມືອງສະໜາມໄຊ ໃຫ້ດີກ່ວາເກົ່າ, ເປັນຕົ້ນ: ການຈັດສັນເຂດທຳການຜະລິດ, ການປ້ອງກັນການລະບາດຂອງພະຍາດ, ການວາງແຜນເຄື່ອນໄຫວຊີວິດປະຈຳວັນ, ການສືບຕໍ່ກໍ່ສ້າງທີ່ຢູ່ອາໃສທັງຊົ່ວຄາວ ແລະ ຖາວອນ ແລະ ອື່ນໆ, ເພື່ອໃຫ້ຊີວິດການເປັນຢູ່ຂອງປະຊາຊົນຜູ້ປະສົບໄພນັບມື້ດີຂຶ້ນຢ່າງຕໍ່ເນື່ອງ.


ຂ່າວ: ບຸນຕຽງ ຈັນທະວົງ (ວສລ)
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.