Header Ads

ເລັ່ງປະເມີນ ແລະ ຟື້ນຟູຄວາມເສຍຫາຍ ໄພພິບັດທຳມະຊາດ



ກອງປະຊຸມຄະນະກຳມະ ການສະເພາະກິດແກ້ໄຂໄພ ພິບັດລະດັບຊາດ ຄັ້ງທີ 6 ຈັດຂຶ້ນ ໃນຕອນເຊົ້າຂອງວັນທີ 4 ຕຸລາ 2018 ທີ່ສຳນັກງານນາຍົກລັດຖະມົນຕີ ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ, ມີພາກສ່ວນກ່ຽວຂ້ອງເຂົ້າຮ່ວມ. ກອງປະຊຸມໄດ້ສະຫຼຸບຕີລາຄາຄືນສະພາບການແກ້ໄຂໄພພິບັດທີ່ເກີດຂຶ້ນທົ່ວປະເທດໃນໄລຍະຜ່ານມາ ໂດຍຜ່ານການລາຍງານຂອງບັນດາກະຊວງ ແລະ ຂະແໜງການກ່ຽວຂ້ອງ, ຕີລາຄາຄືນສະພາບການຟື້ນຟູຊີວິດການເປັນຢູ່ຂອງປະຊາຊົນທີ່ປະສົບອຸທົກກະໄພຢູ່ເມືອງສະໜາມໄຊ, ແຂວງ ອັດຕະປື ໂດຍສະເພາະຄວາມຄືບໜ້າການກໍ່ສ້າງສູນພັກຊົ່ວຄາວຢູ່ຈຸດຕ່າງໆ ແລະ ການແຈກຢາຍສະບຽງອາຫານໃຫ້ປະຊາຊົນຜູ້ປະສົບໄພ. 

ນອກນີ້ ກອງປະຊຸມໄດ້ຄົ້ນຄ້ວາປຶກສາຫາລືກ່ຽວກັບຮ່າງບົດຖະແຫຼງຂ່າວກ່ຽວກັບການປະກາດ, ການຢຸດຕິ, ການຊອກຄົ້ນຫາຜູ້ສູນຫາຍຍ້ອນອຸທົກກະໄພຢູ່ເມືອງສະໜາມໄຊ. ທ່ານ ສອນໄຊ ສີພັນ ດອນ ກ່າວວ່າ: ໃນກອງປະຊຸມ ນາຍົກ ແລະ ຮອງນາຍົກລັດ ຖະມົນຕີຄັ້ງທີ 2 ຈັດຂຶ້ນເມື່ອບໍ່ດົນມານີ້ ໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ຄະນະກຳມະການສະເພາະກິດແກ້ໄຂໄພພິບັດລະດັບຊາດທີ່ເອົາໃຈໃສ່ປະຕິບັດຕາມການຊີ້ນຳຂອງກົມການເມືອງສູນກາງພັກ ແລະ ຕາມແຜນແກ້ໄຂໄພພິບັດຂອງລັດຖະບານ, ພ້ອມນີ້ ຍັງເນັ້ນໜັກໃຫ້ຄະນະກຳມະການສະເພາະກິດແກ້ໄຂໄພພິບັດລະດັບຊາດສືບຕໍ່ຈັດຕັ້ງປະຕິບັດຫຼາຍວຽກງານສຳຄັນ ໂດຍສະເພາະຢູ່ແຂວງ ອັດຕະປື ຕ້ອງສືບຕໍ່ຟື້ນຟູຊີວິດການເປັນຢູ່ຂອງປະຊາຊົນຜູ້ປະສົບອຸທົກກະໄພທີ່ເມືອງສະໜາມໄຊ ໃຫ້ດີກ່ວາເກົ່າ ເປັນຕົ້ນ: ການຈັດສັນເຂດທຳການຜະລິດ, ປ້ອງກັນການລະບາດຂອງພະຍາດ, ການວາງແຜນເຄື່ອນໄຫວຊີວິດປະຈໍາວັນ, ສືບຕໍ່ກໍ່ສ້າງທີ່ຢູ່ອາໄສທັງຊົ່ວຄາວ ແລະ ຖາວອນ ລວມທັງດ້ານອື່ນໆນຳດ້ວຍວຽກງານຄົ້ນຄ້ວາກ່ຽວກັບການປະກອບຄະນະສະເພາະກິດໄປປະຈຳຢູ່ແຂວງອັດຕະປື ເພື່ອຊຸກຍູ້, ຕິດຕາມ ແລະ ຊ່ວຍເຫຼືືອການຈັດຕັ້ງປະຕິບັດວຽກງານຕ່າງໆ ເພື່ອຊ່ວຍເຫຼືືອປະຊາຊົນຜູ້ປະສົບອຸທົກກະໄພທີ່ເມືອງສະໜາມໄຊ ຈົນກ່ວາເຂົາເຈົ້າຈະມີຄວາມເຂັ້ມແຂງດ້ວຍຕົນເອງໄດ້. ເຊັ່ນດຽວກັບແຂວງຕ່າງໆທີ່ຈະຕ້ອງໄດ້ເລັ່ງຟື້ນຟູຄວາມເສຍຫາຍຕາມສະພາບຕົວຈິງເຊັ່ນ: ໄຟຟ້າທີ່ຖືກຕັດຂາດ, ຫົນທາງເປ່ເພກະທົບຕໍ່ການສັນຈອນ, ຜົນພວງໄປເຖິງການຈໍລະຈອນຂອງສິນຄ້າໃນທ້ອງຕະຫຼາດ, ການສຶກສາ ລວມທັງຊີວິດການເປັນຢູ່ຂອງປະຊາຊົນແຕ່ລະເຂດທີ່ໄດ້ຮັບຜົນກະທົບທີ່ຈະຕ້ອງໄດ້ເອົາໃຈໃສ່ຮ່ວມກັນ. 


ຂ່າວ-ພາບ: ຄຳເຮືອງ - ນສພ ປະຊາຊົນ 
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.