Header Ads

ແຂວງຈໍາປາສັກ ປະກາດອະໄພຍະໂທດ ຫຼຸດຜ່ອນໂທດ ແລະ ປ່ອຍຕົວນັກໂທດ 181 ຄົນ ປະຈໍາປີ 2018


ແຂວງຈໍາປາສັກ ປະກາດການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ 181 ຄົນ ປະຈໍາປີ 2018 ໄດ້ຈັດພິທີປະກາດອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ ປະຈໍາປີ 2018 ມີທັງໝົດ 181 ຄົນ, ເຊິ່ງພິທີຈັດຂຶ້ນໃນວັນທີ 11 ທັນວາ 2018 ຢູ່ຫໍວັດທະນະທໍາບັນດາເຜົ່າ ຫຼັກ 7 ນະຄອນປາກເຊ ໂດຍການເຂົ້າຮ່ວມຂອງທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ປະທານຄະນະກໍາມະການອະໄພຍະໂທດລະດັບແຂວງ, ທ່ານ ພົນຈັດຕະວາ ສີພັນ ວົງເຮືອງຄໍາ ຄະນະປະຈໍາພັກແຂວງ ຫົວໜ້າກອງບັນຊາການ ປກສ ແຂວງ. ມີຄະນະກໍາມະການອະໄພຍະໂທດລະດັບແຂວງ, ຕາງໜ້າກຸງສຸນ ສສ ຫວຽດນາມ ປະຈໍາ 4 ແຂວງພາກໃຕ້ລາວ, ເຈົ້າໜ້າທີ່ກ່ຽວຂ້ອງ, ນັກສຶກສາສະຖາບັນການສຶກສາພາຍໃນແຂວງ ຕະຫຼອດຮອດນັກໂທດທີ່ໄດ້ຮັບການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວເຂົ້າຮ່ວມ.


ນພິທີ ໄດ້ຜ່ານບົດສະຫຼຸບຕີລາຄາໂດຍຫຍໍ້ ກ່ຽວກັບສະພາບການຈັດຕັ້ງປະຕິບັດວຽກງານອະໄພຍະໂທດ, ຜ່ານລັດຖະດໍາລັດຂອງປະທານປະເທດ ວ່າດ້ວຍການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ ພ້ອມທັງຜ່ານລາຍຊື່ນັກໂທດ ທີ່ໄດ້ຮັບການໃຫ້ອະໄພຍະໂທດ ປະຈໍາປີ 2018 ຢູ່ແຂວງຈໍາປາສັກ ເຊິ່ງມີທັງໝົດ 181 ຄົນ, ຍິງ 21 ຄົນ ແລະ ຕ່າງປະເທດ 1 ຄົນ, ໃນນັ້ນ ນັກໂທດທີ່ຖືກຫຼຸດຜ່ອນໂທດ ມີ 125 ຄົນ, ຍິງ 18 ຄົນ, ນັກໂທດທີ່ຖືກປ່ອຍຕົວ ມີ 56 ຄົນ, ຍິງ 3 ຄົນ. ຈາກນັ້ນ ປະທານພິທີ ກໍ່ໄດ້ໃຫ້ກຽດມອບໃບຢັ້ງຢືນຂອງຄະນະກໍາມະການອະໄພຍະໂທດລະດັບຊາດ ໃຫ້ແກ່ນັກໂທດ ທີ່ໄດ້ຮັບການອະໄພຍະໂທດຕື່ມອີກ.


ທີ່ມາ: ນສພ ຈຳປາໃຫ່ມ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.