Header Ads

ຫຼວງພະບາງປະກາດນະໂຍບາຍຫຼຸດຜ່ອນໂທດໃຫ້ນັກໂທດປະຈຳປີ 2018



ໃນວັນທີ່ 12 ທັນວາ 2018, ຢູ່ຫ້ອງປະຊຸມຂອງອົງການໄອຍະການປິຊາຊົນແຂວງຫຼວງພະບາງ, ອົງການປົກຄອງແຂວງຫຼວງພະບາງ ໄດ້ຈັດພິທີປະກາດ ອະໄພໂທດ, ຜ່ອນໂທດ ແລະ ປ່ອຍຕົວນັກໂທດປະຈຳປີ 2018, ໂດຍພາຍໃຕ້ການເປັນປະທານຂອງ ທ່ານ ວົງສະຫວັນ ເທບພະຈັນ, ຮອງເຈົ້າແຂວງໆຫຼວງພະບາງ, ແລະ ໂດຍມີຜູ້ຕາງໜ້າພະແນກ ແລະ ຂະແຫນງການອ້ອມຂ້າງແຂວງ, ຍາດຕິພີ່ນ້ອງ ແລະ ນັກໂທດເຂົ້າຮ່ວມ. ໃນພິທີ, ໄດ້ມີການອ່ານຜ່ານລັດຖະດຳລັດ ຂອງປະທານປະເທດ ວ່າດ້ວຍການ ອະໄພໂທດ ຜ່ອນໂທດ ແລະ ປ່ອຍຕົວນັກໂທດ ໃນທົ່ວປະເທດປະຈຳປີ 2018, ຊຶ່ງເວົ້າສະເພາະຢູ່ແຂວງຫຼວງພະບາງ ແມ່ນມີນັກໂທດທີ່ໄດ້ຮັບນະໂຍບາຍທັງໝົດ 25 ຄົນ, ຍິງ 7 ຄົນ, ໃນນັ້ນ ນະໂຍບາຍອະໄພໂທດຫຼຸດຜ່ອນໂທດ 23 ຄົນ, ຍິງ 6 ຄົນ ແລະ ປ່ອຍຕົວ 2 ຄົນ ຍິງ 1 ຄົນ.



 ໃນໂອກາດນີ້, ທ່ານ ວົງສະຫວັນ ເທບພະຈັນ ໄດ້ຂຶ້ນມີຄຳເຫັນ ໂດຍໄດ້ເນັ້ນໃຫ້ຜູ້ທີ່ໄດ້ຮັບອະໄພໂທດຫຼຸດຜ່ອນໂທດ ຈົ່ງສືບຕໍ່ໃນການປະຕິບັດລະບຽບຂອງຄ້າຍຄຸມຂັງ ເພື່ອໃຫ້ໄດ້ຮັບນະໂຍບາຍຕື່ມໃນປີຕໍ່ໄປ; ສ່ວນຜູ້ທີ່ໄດ້ຮັບນະໂຍບາຍອະໄພໂທດປ່ອຍຕົວ ແມ່ນຕ້ອງສືບຕໍ່ປະຕິບັດພັນທະຂອງພົນລະເມືອງລາວ ໃນການດຳລົງຊີວິດໃຫ້ສອດຄ່ອງກັບລະບຽບກົດໝາຍ ແລະ ຮັບປະກັນບໍ່ໃຫ້ກັບຄືນໄປເຮັດຜິດລະບຽບກົດໝາຍບ້ານເມືອງຢ່າງເດັດຂາດ. ການປະຕິບັດນະໂຍບາຍອະໄພໂທດ ຜ່ອນໂທດ ແລະປ່ອຍຕົວນັກໂທດ ເປັນບູລິມະສິດໜຶ່ງທີ່ພັກ ແລະ ລັດຖະບານ ແຫ່ງ ສປປ ລາວ ໄດ້ຈັດຕັ້ງປະຕິບັດ ໃນໄລຍະການສະເຫຼີມສະຫຼອງ ວັນຊາດທີ່ 2 ທັນວາ, ໃນນັ້ນ ໄດ້ມີການຂັດເລືອກປະຕິບັດຕໍ່ນັກໂທດ ທີ່ມີຜົນງານດີເດັ່ນ ໃນການປະຕິບັດລະບຽບຂອງຄ້າຍຄຸມຂັງ ແນໃສ່ເພື່ອເຮັດໃຫ້ນັກໂທດທີ່ຮູ້ສຶກຜິດ ໃຫ້ກັບຄືນມາໃຊ້ຊີວິດໄດ້ຢ່າງເປັນປົກກະຕິ.

ຂ່າວ: ອາພຸດເດດ ບຸບຜາ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.