Header Ads

ເປີດເທດສະການກອງເຂົ້າໃຫຍ່ ໄຫວ້ພຣະທາດອິງຮັງ ເພື່ອສະເຫຼີມສະຫຼອງປີທ່ອງທ່ຽວລາວ 2018 ຢ່າງເປັນທາງການ


ໃນວັນທີ 18 ທັນວາ 2018 ຜ່ານມາ ຢູ່ທີ່ແຂວງສະຫວັນນະເຂດ ໄດ້ເປີດງານເທດສະການກອງເຂົ້າໃຫຍ່ ໄຫວ້ພຣະທາດອິງຮັງ ເພື່ອສະເຫຼີມສະຫຼອງ ປີທ່ອງທ່ຽວລາວ 2018 ຂອງແຂວງ ສະຫວັນນະເຂດ ຂຶ້ນ. ໂດຍການການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະຊີ້ນໍາລະດັບຊາດ ໃນການເປີດປີທ່ອງທ່ຽວລາວ 2018, ມີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານລັດຖະມົນຕີ, ບັນດາອໍານາດການປົກຄອງແຂວງ, ເມືອງ ພ້ອມດ້ວຍ ພໍ່ແມ່ປະຊາຊົນແຂວງສະຫວັນນະເຂດ ເຂົ້າຮ່ວມຢ່າງພ້ອມພຽງ.



ໂອກາດກ່າວເປີດພິທີ, ທ່ານ ສັນຕິພາບ ພົມວິຫານ ໄດ້ກ່າວວ່າ: ການເປີດງານເທດສະການກອງເຂົ້າໃຫຍ່ ໄຫວ້ພຣະທາດອິງຮັງ ເພື່ອສະເຫຼີມສະຫຼອງ ປີທ່ອງທ່ຽວລາວ 2018 ຊຶ່ງພໍດີກົງກັບ ງານນະມັດສະການພຣະທາດອິງຮັງ ທີ່ເປັນປູຊະນິຍະສະຖານ ຄູ່ບ້ານຄູ່ເມືອງອົງເກົ່າແກ່ ແລະ ສັກສິດ ທີ່ໄດ້ໝູນວຽນມາອີວາລະໜຶ່ງ ໃນເດືອນຈຽງເພັງຂອງທຸກໆປີ ຕາມຮີດຄອງປະເພນີ ທີ່ເຄີຍປະຕິບັດກັນມາ. ການຈັດງານໃນຄັ້ງນີ້, ໄດ້ໄຂຂຶ້ນໃນທ່າມກາງບັນຍາກາດ ທີ່ທົ່ວພັກ, ທົ່ວກອງທັບ ແລະ ປະຊາຊົນລາວທັງຊາດ ພວມອອກແຮງແຂ່ງຂັນກັນ ຈັດຕັ້ງປະຕິບັດ ແລະ ຜັນຂະຫຍາຍ ເນື້ອໃນຈິດໃຈກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງລັດຖະບານ ເວົ້າລວມ, ເວົ້າສະເພາະ ແຂວງສະຫວັນນະເຂດ ພວມຈັດຕັ້ງປະຕິບັດ ແລະ ຜັົນຂະຫຍາຍເນື້ອໃນຈິດໃຈ ກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ໃຫ້ປະກົດຜົນເປັນຈິງ, ຊຶ່ງໃນນັ້ນ ການພັດທະນາວຽກງານດ້ານວັດ ທະນະທໍາ ແລະ ທ່ອງທ່ຽວ ເປັນວຽກບູລິມະສິດທີ່ສໍາຄັນໜຶ່ງຂອງແຂວງ ໃນການພັດທະນາ ແນໃສ່ປົກປັກຮັກສາວັດ ທະນະທໍາອັນດີງາມຂອງຊາດ ກໍ່ຄື ເອກະລັກຂອງປະຊາຊົນບັນດາເຜົ່າ ພາຍໃນແຂວງສະຫວັນນະເຂດ. 



ການເປີດປີທ່ອງທ່ຽວ ຂອງແຂວງສະຫັວນນະເຂດ ປີ 2018 ນີ້, ນອກຈາກຈະເປັນການສ້າງລາຍຮັບ ມາສູ່ແຂວງແລ້ວ ພວກເຮົາຍັງໄດ້ຫຼາຍຢ່າງຕາມມາ ໂດຍສະເພາະແມ່ນ ໄດ້ເຜີຍແຜ່ແນວທາງນະໂຍບາຍຂອງພັກ-ລັດ ກໍ່ຄື ຜົນສໍາເລັດໃນການປົກປັກຮັກສາ ແລະ ພັດທະນາປະເທດຊາດ, ສ່ອງແສງພາບພົດອັນຈົບງາມຂອງ ສປປ ລາວ ທັງໃນດ້ານການເມືອງ, ເສດຖະກິດ, ວັດທະນະທໍາ ແລະ ສັງຄົມ ລວມທັງ ທ່າແຮງ ແລະ ຄວາມອາດສາມາດໃນການພັດທະນາ ເພື່ອໃຫ້ປະເທດຊາດຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາ ໃນປີ 2020 ທັງເປັນການຊຸກຍູ້ສົ່ງເສີມ ການທ່ອງທ່ຽວລາວ ດ້ວຍ 3 ປະການຄື: ທ່ອງທ່ຽວທໍາມະຊາດ, ວັດທະນະທໍາ ແລະ ປະຫວັດສາດ ໃຫ້ມີການຂະຫຍາຍຕົວຢ່າງແຂງແຮງ, ຕໍ່ເນື່ອງ, ສີຂຽວ ແລະ ຍືນຍົງ ໂດຍການມີສ່ວນຮ່ວມຂອງສັງຄົມ ແລະ ປະຊາຊົນບັນດາເຜົ່າ. ພາຍໃນງານດັ່ງກ່າວ, ຍັງໄດ້ມີຂະບວນສິນລະປະວັນນະຄະດີ, ກິລາກາຍຍຍະກໍາ ແລະ ກ້ອນກໍາລັງຕ່າງໆ, ບັນດາບໍລິສັດຫ້າງຮ້ານ ແລະ ບັນດາເມືອງຕ່າງໆພາຍໃນແຂວງ ທີ່ໄດ້ນໍາເອົາຜະລິດຕະພັນ ກະສິກໍາ-ຫັດຖະກໍາ ທີ່ເປັນເອກະລັກຂອງຕົນ ເຂົ້າຮ່ວມງານວາງ ສະແດງຢ່າງເປັນຂະບວນຟົດຟື້ນ.



ໂອກາດເຂົ້າຮ່ວມງານ ໃນຄັ້ງນີ້, ທ່ານ ສອນໄຊ ສີພັນດອນ ໄດ້ໃຫ້ກຽດລັ່ນຄັ້ງ 9 ບາດ ເພື່ອເປີດງານເທດສະການກອງເຂົ້າໃຫຍ່ ໄຫວ້ພຣະທາດອິງຮັງ ເພື່ອສະເຫຼີມສະຫຼອງປີທ່ອງທ່ຽວລາວ 2018 ຂອງແຂວງສະຫວັນນະເຂດ ຢ່າງເປັນທາງການ ແລະ ມອບເງິນຈໍານວນ 30 ລ້ານກີບ ເພື່ອກອບສ່ວນເຂົ້າໃນການສະເຫຼີມສະຫຼອງງານ ດັ່ງກ່າວ ພ້ອມທັງ ຢ້ຽມຊົມບັນດາຫ້າງຮ້ານຕ່າງໆພາຍໃນງານ ຕື່ມອີກ.


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ 
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.