Header Ads

ສານຕັດສິນຈຳຄຸກ 3 ສ່ຽວ ໂທດຖານລັກຊັບ ແລະ ຊື້-ຂາຍຊັບຜິດກົດໝາຍ




ອີງຕາມາການລາຍງານຂອງ ນສພ ຄວາມສະຫງົບ  ວ່າ: ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ເປີດປະຊຸມສານໃນວັນທີ 12 ທັນວາ 2018 ເພື່ອໄຕ່ສວນຄະດີອາຍາຂໍ້ຫາທຳລາຍຊັບ, ລັກຊັບ ແລະ ຊື້-ຂາຍຊັບຂອງພົນລະເມືອງຢ່າງຜິດກົດໝາຍ ໂດຍມີຈຳເລີຍ 3 ຄົນ ຊື່ທ້າວ ໄວຄຸນ ຫຼື ແຕນ ອາຍຸ 24 ປີ, ທ້າວ ອຳ ອາຍຸ 26 ປີ ແລະ ທ້າວ ຈອນນີ້ ອາຍຸ 27 ປີ ທັງ 3 ຢູ່ບ້ານໜອງພົງ ເມືອງຫາດຊາຍຟອງ ນະຄອນຫຼວງວຽງຈັນ ແລະ ສານໄດ້ພິຈາລະນາຕັດສິນຕາມມາດຕາ 119, 122, 124, ແລະ 152 ແຫ່ງ ສປປ ລາວ.

ອົງການໄອຍະການປະຊາຊົນໄດ້ຖະແຫຼງຕໍ່ຄະນະສານອາຍາວ່າ: ເດືອນມິຖຸນາ 2017 ທ້າວ ອຳ ແລະ ທ້າວ ໄວຄູນ ໄດ້ພາກັນຂັບລົດຈັກໄປເຂດໂຮງຮຽນບ້ານຖິ່ນແຖ່ນ ຈຸດປະສົງແມ່ນຊອກລັກຊັບ ຄັ້ງນີ້ລັກໄດ້ລົດເວບ 100 ສີແດງດຳ ແລ້ວນຳລົດທີ່ລັກໄປເຮືອນຂອງ ທ້າວ ອຳ ເພື່ອແກະປ້າຍອອກ ປ່ຽນສີລົດເປັນສີປອນດຳ ແລ້ວນຳໄປຂາຍໃຫ້ ນາງ ເທີງ ຄົນບ້ານດຽວກັນໃນລາຄາ 1.500.000 ກີບ, ຕໍ່ມາໃນ ເດືອນດຽວກັນ ທ້າວ ອຳ ກັບ ທ້າວ ໄວຄູນ ໄປລັກລົດເທນາຂອງປະຊາຊົນຢູ່ເຂດ ບ້ານສິມມະໂນ ແຕ່ບໍ່ໄດ້ຂາຍ ເອົາໄວ້ເປັນລົດໃຊ້ກໍ່ເຫດລັກຊັບຄັ້ງຕໍ່ໄປ, ເດືອນກໍລະກົດ 2017 ທ້າວ ໄວຄູນ ເອົາເຫຼັກມາດັດແປງເປັນປືນສັ້ນຍິງລູກແວ່ງ ເພື່ອເອົາພົກຕິດຕົວໃນຍາມເດິກ, ທັດມາ ທ້າວ ໄວຄູນ ແລະ ທ້າວ ອຳ ໄປລັກລົດເທນານິວ ສີແດງດຳ ຢູ່ເຂດບ້ານນາຄວາຍ ເມືອງໄຊເສດຖາ ແລ້ວນຳໄປປ່ຽນສີລົດເປັນສີຂາວທະເລ ແລະນຳໃຊ້ເອງ, ໃນເດືອນດຽວກັນນີ້ ທ້າວ ໄວຄູນ ຍັງບອກໃຫ້ ທ້າວ ອຳ ໄປສົ່ງຢູ່ເຂດບ້ານໜອງແປນເໜືອ ເພື່ອຊອກຫາລັກຊັບ ເມື່ອທ້າວ ອຳ ກັບມາບ້ານ ທ້າວ ໄວຄູນກໍໄດ້ຕະເວນຍ່າງ ຊອກລັກຊັບ ແລະ ລັກໄດ້ລົດຈັກເວບ 100 ສີຟ້າດຳ ເມື່ອໄດ້ລົດແລ້ວກໍຂັບໄປຫາ ທ້າວ ອຳພ້ອມທັງດັດແປງສະພາບ ແລ້ວນຳໄປຂາຍໃຫ້ທ້າວ ໄພ ຄົນບ້ານດຽວກັນ ໃນລາຄາ 1.000.000 ກີບ, ຕໍ່ມາໃນເດືອນດຽວນີ້ ທ້າວ ອຳ ໄດ້ໄປສົ່ງ ທ້າວ ໄວຄູນ ຢູ່ເຂດທ່ານາແລ້ງ ຄັ້ງນີ້ລັກໄດ້ລົດຈັກເວບ 100 ສີແດງດຳ ແລ້ວນຳໄປຂາຍໃຫ້ທ້າວ ໜຸດ ຄົນບ້ານດຽວກັນແຕ່ບໍ່ທັນໄດ້ເງິນ, ນອກນີ້ ຍັງລັກລົດຈັກເວບຈີນສີດຳ ຂອງປະຊາຊົນເຂດບ້ານດຽວກັນ ແລ້ວເອົາໄປນຳໃຊ້ຊອກຫາລັກຊັບ, ຕໍ່ມາທ້າວ ອຳ ໄດ້ຂັບ ລົດເທນາທີ່ລັກມານັ້ນ ໄປສົ່ງ ທ້າວ ໄວຄູນ ຢູ່ບ້ານຄວາຍແດງ ເພື່ອຊອກລັກຊັບ ທ້າວ ໄວຄູນ ລັກໄດ້ລົດຈັກເວບ 100 ແລ້ວນຳໄປດັດແປງ ແລະ ຂາຍໃຫ້ ທ້າວ ຈອນນີ້ (ຈຳເລີຍ 3) ໃນ ລາຄາ 1.000.000 ກີບ.

ຈາກນັ້ນມາ, ຈຳເລີຍ 1-2 ກໍໄດ້ຮ່ວມກັນຕະເວນລັກຊັບຂອງພົນລະເມືອງຕາມນະຄອນຫຼວງວຽງຈັນແລ້ວນຳໄປຂາຍໃຫ້ ກັບພັກພວກ ກໍຄື ທ້າວ ຈອນນີ້ ແລະ ຄົນອື່ນ ຄັນລະ 1.000.000-2.000.000 ກີບ, ເງິນທີ່ໄດ້ມາຈາກການລັກຊັບ-ຂາຍຊັບນັ້ນແມ່ນໄດ້ເອົາໄປໃຊ້ຈ່າຍກິນຫຼິ້ນຟຸມເຟືອຍໝົດ; ມາວັນທີ 21 ພະຈິກ 2017, ເຈົ້າໜ້າທີ່ໄດ້ກັກຕົວ ທ້າວ ໄວຄູນ ມາດຳເນີນຄະດີ ມາວັນທີ 29 ກັນຍາ 2017 ກໍສາມາດຕິດຕາມກັກຕົວ ທ້າວ ອຳ ມາດຳເນີນຄະດີ, ສ່ວນທ້າວ ຈອນນີ້ ແມ່ນເຈົ້າໜ້າທີ່ໄດ້ຕິດຕາມຕົວມາໃຫ້ການໃນເວລາຕໍ່ມາ.

ຈາກການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານທີ່ປະກອບເຂົ້າໃນສຳນວນຄະດີຢ່າງຄົບຖ້ວນຮອບດ້ານ ແລະ ພາວະວິໃສແລ້ວ ເຫັນວ່າ ການກະທຳຂອງຈຳເລີຍ 1 ໃນຂໍ້ຫາ ທຳລາຍຊັບຂອງພົນລະເມືອງ ແລະ ຈຳເລີຍ 2 ຂໍ້ຫາລັກຊັບພົນລະເມືອງ ແລະ ຈຳເລີຍ 3 ຂໍ້ຫາ ຊື້-ຂາຍຊັບຜິດກົດໝາຍ. ສະນັ້ນ, ການກະທຳຂອງພວກຈຳເລີຍ ໄດ້ສ້າງຄວາມເສຍຫາຍ ໃຫ້ກັບຊັບສິນຂອງພົນລະເມືອງຕາມທີ່ໄດ້ກຳນົດໄວໃນມາດຕາ 76, ມາດຕາ 199 ວັກ 4, ມາດຕາ 122 ວັກ 1 ແລະ ມາດຕາ 124 ວັກ 1 ຂອງກົດໝາຍ ວ່າດ້ວຍການດຳເນີນຄະດີອາຍາສະບັບປັບປຸງ ປີ 2012 ມາດຕາ 152 ຂໍ້ 5 ແລະ ມາດຕາ 156. ສະນັ້ນ ຄະນະສານຈຶ່ງເຫັນ ຄວນລົງໂທດຕັດອິດສະຫຼະພາບ ຈຳເລີຍ 1. 6 ປີ ປັບໃໝ 9.500.000 ກີບ, ຈຳເລີຍ 2. 4 ປີ ປັບໃໝ 3.000.000 ກີບ ແລະ ຈຳເລີຍ 3. 6 ເດືອນ ປັບໃໝ 1.500.000 ກີບ, ໃຫ້ຈຳເລີຍ 1 ໃຊ້ ແທນຄ່າເສຍຫາຍໃຫ້ແກ່ ທ້າວ ວິລະກອນ 55.000 ບາດ

ພາບ ແລະ ຂ່າວ : ນສພ ຄວາມສະຫງົບ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.