Header Ads

ຜົນກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4



ສປປ ລາວ ໄດ້ເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4, ໃນວັນທີ 17 ທັນວາ 2018, ພາຍໃຕ້ການເປັນປະທານຮ່ວມລະຫວ່າງ ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ຫວັງ ອີ້, ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາຊົນຈີນ, ໂດຍມີລັດຖະມົນຕີ ແລະ ຄະ​ນະ​ຜູ້​ແທນຈາກ​ບັນ​ດາ​ປະ​ເທດ​ແມ່​ນ້ຳ​ຂອງ ແລະ ສປ ຈີນ ເຂົ້າຮ່ວມຫຼາຍກວ່າ 120 ​ທ່ານ. ກອງປະຊຸມຄັ້ງນີ້ ດຳເນີນໄປພາຍໃຕ້ຄໍາຂວັນ:

 “ເພີ່ມທະວີການເປັນຄູ່ຮ່ວມມື ເພື່ອຄວາມສົມບູນພູນສຸກຮ່ວມກັນ” (Enhancing Partnership for Shared Prosperity) ໂດຍໄດ້ປຶກສາຫາລືກັນໃນຫຼາຍບັນຫາເປັນຕົ້ນແມ່ນ ການຈັດຕັ້ງປະຕິບັດບັນດາໂຄງການເຫັນຜົນໄວ ຈໍານວນ 45 ໂຄງການ ເຊິ່ງປະຈຸບັນສາມາດປະຕິບັດສໍາເລັດແລ້ວ 25 ໂຄງການ, ກໍາລັງປະຕິບັດຢູ່ 8 ໂຄງການ ແລະ ຍັງລໍຖ້າການຈັດຕັ້ງປະຕິບັດອີກ 13 ໂຄງການ; ບັນດາໂຄງການພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ຈໍານວນ 132 ໂຄງການ ຈັດຕັ້ງປະຕິບັດແລ້ວ 24 ໂຄງການ, ກໍາລັງຈັດຕັ້ງປະຕິບັດຢູ່ 98 ໂຄງການ ແລະ ຍັງລໍຖ້າອີກ 4 ໂຄງການ ໃນນັ້ນ ມີໂຄງການທີ່ໄດ້ຮັບການຈັດຕັ້ງປະຕິບັດ ຢູ່ ສປປ ລາວ ຈໍານວນ 18 ໂຄງການ (ໂຄງການເຫັນຜົນໄວ 5 ໂຄງການ ແລະ ພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງອີກ 13 ໂຄງການ), ໄດ້ທົບທວນຄືນ ກ່ຽວກັບ ການຈັດຕັັ້ງປະຕິບັດແຜນງານ 5 ປີ 2018 – 2022 ໃນໄລຍະ 1 ປີຜ່ານມາ, ເຊິ່ງແຜນງານ 5 ປີ ດັ່ງກ່າວ ໄດ້ຖືກຮັບຮອງເອົາຢູ່ກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ທີ່ ປະເທດ ກຳປູເຈຍ ໃນຕົ້ນປີ 2018 ແລະ ວາງທິດທາງການຮ່ວມມືໃນຕໍ່ໜ້າ. ນອກຈາກນີ້, ຍັງໄດ້ມີການຮັບຮອງເອົາບົດຖະແຫລງຂ່າວຮ່ວມກອງປະຊຸມ ລວມທັງບົດລາຍງານການຈັດຕັ້ງປະຕິບັດບັນດາໂຄງການ ໃນແຜນງານ 5 ປີ 2018-2022.

ກ່ອນກອງປະຊຸມ ລັດຖະມົນຕີຕ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ໄດ້ມີການຈັດກອງປະຊຸມໜ່ວຍງານວິຊາການຮ່ວມດ້ານການທູດ ແລະ ກອງປະຊຸມເຈົ້າໜ້າທີ່ອາວຸໂສ ໃນລະຫວ່າງ ວັນທີ 15-16 ທັນວາ 2018 ເພື່ອປຶກສາຫາລືບັນດາເອກະສານທີ່ຮັບຮອງເອົາ ໃນກອງປະຊຸມລັດຖະມົນຕີຕ່າງປະເທດ ຄັ້ງທີ 4.


ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ຖືກສ້າງຕັ້ງຂຶ້ນ ໃນປີ 2016 ເຊິ່ງຖືເປັນຂອບການຮ່ວມມື ລະຫວ່າງ ສປ ຈີນ ແລະ ບັນດາປະເທດແມ່ນໍ້າຂອງ ກໍຄື ສປປ ລາວ, ຫວຽດນາມ, ກຳປູເຈຍ, ມຽນມາ ແລະ ໄທ; ໂດຍມີຈຸດປະສົງ ເພື່ອຮ່ວມມືກັນພັດທະນາເສດຖະກິດ ແລະ ສັງຄົມ ໂດຍແນໃສ່ຫຼຸດຜ່ອນຄວາມແຕກໂຕນທາງດ້ານການພັດທະນາໃນພາກພື້ນນີ້ ເຊິ່ງມີກົນໄກການຮ່ວມມືແຕ່ລະດັບໜ່ວຍງານວິຊາການໃນ 5 ຂົງເຂດບູລິມະສິດ ໄປຈົນເຖິງລະດັບກອງປະຊຸມຜູ້ນໍາຂັ້ນສູງ ເຊິ່ງກອງປະຊຸມລະດັບລັດຖະມົນຕີຕ່າງປະເທດ ແມ່ນຖືກຈັດຂຶ້ນໃນທຸກໆປີ ໂດຍການເປັນປະທານໝູນວຽນຂອງປະເທດແມ່ນໍ້າຂອງ ແລະ ສປ ຈີນ. ສປປ ລາວ ໄດ້ຮັບກຽດໃຫ້ເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດ ຄັ້ງທີ 4 ໃນປີ 2018 ແລະ ຈະສືບຕໍ່ເປັນປະທານກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ໃນປີ 2020.

ພາບ ແລະ ຂ່າວ: ກະຊວງການຕ່າງປະເທດ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.