Header Ads

ພະແນກ ຖວທ ແຂວງຫຼວງພະບາງຈະຈັດກິດຈະກໍາຖີບລົດ ເພື່ອສຸຂະພາບ



ພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ໃນນາມຄະນະຮັບຜິດຊອບຈັດກິດຈະກໍາປີທ່ອງທ່ຽວ 2018 ທີ່ແຂວງຫຼວງພະບາງ,ຂໍຖືເປັນກຽດ ເຊີນບັນດາພາກສ່ວນ ລັດ,ເອກະຊົນ ແລະ ປະຊາຊົນ ໃນຂອບເຂດແຂວງຫຼວງພະບາງ ເຂົ້າຮ່ວມໃນງານກິດຈະກໍາຂີ່ລົດຖີບ ເພື່ອສົ່ງເສີມການທ່ອງທ່ຽວລາວ 2018 ທີ່ຈະໄດ້ຈັດຂື້ນໃນຕອນເຊົ້າຂອງວັນທີ 15 ທັນວາ 2018 ໂດຍມີຈຸດສະຕາດ(ຈຸດເລີ່ມຕົ້ນ)ຢູ່ທີ່ສາມແຍກໂຮງແຊກເກົ່າ ຕໍ່ໜ້າຫ້ອງການທ່ອງທ່ຽວແຂວງ,ໄປຫາອານຸສາວະລີ ປະທານໄກສອນ ພົມວິຫານ ຕາມເສັ້ນທາງພູວ່າວ(ເສັ້ນທາງ ໄກສອນ ພົມວິຫານ) ຫາ ເສັ້ນທາງ ສຸພານຸວົງ ຜ່ານອານຸສາວະລີ ສຸພານຸວົງ ຫາ ເສັ້ນທາງເຂດບ້ານໝື່ນນາ ໄປຕາມແຄມຄານ ໂຄ້ງຂື້ນຫາເສັ້ນທາງໃຈກາງນະຄອນຫຼວງພະບາງ ໄປຕາມເສັ້ນທາງສີສະຫວ່າງວົງ ຈົນເຖິງຈຸດສະຕາດ(ຈຸດເລີ່ມຕົ້ນ) ຖືວ່າສິ້ນສຸດ.ເຊິ່ງຄາດວ່າຈະມີຜູ້ເຂົ້າຮ່ວມປະມານ 300-500ຄົນເຂົ້ຮ່ວມ.

ສໍາລັບການຈັດກິດຈະກໍາຂີ່ລົດຖີບຄັ້ງນີ້ແມ່ນໜຶ່ງໃນ 7 ກິດຈະກໍາ ປີທ່ອງທ່ຽວລາວ 2018 ຂອງແຂວງຫຼວງພະບາງ ທີ່ສົ່ງເສີມການທ່ອງທ່ຽວ,ເພື່ອດິງດູດນັກທ່ອງທ່ຽວເຂົ້າມາທ່ຽວຊົມ ແລະ ຮ່ວມກິດຈະກໍາ ຢູ່ໃນແຂວງຫຼວງພະບາງໃຫ້ມີຄວາມຟົດຟື້ນ,ເຕັມໄປດ້ວຍ ຄວາມຫຼາກຫຼາຍຂອງການສື່ສານດ້ານກິດຈະກໍາ,ເອກະລັກ ເພື່ອຕ້ອນຮັບນັກທ່ອງທ່ຽວ ທັງສ້າງລາຍຮັບຈາກການທ່ອງທ່ຽວໃຫ້ຫຼາຍຂື້ນ ແລະ ອີກດ້ານໜຶ່ງກໍເປັນການເສີມສ້າງສຸຂະພາບ ໃຫ້ແຂງແຮງ,ທັງຊຸກຍູ້ ແລະ ພັດທະນາແຂວງຫຼວງພະບາງໃຫ້ຈະເລີນຮຸ່ງເຮືອງ ແລະ ຍືນຍົງ.


ຂ່າວ: ເພັດສາຄອນ ສິມມະວົງ

© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.