Header Ads

ເຫດການ ຄາດຕະກຳ ເມຍ ລູກທີ່ບ້ານວຽງພັດທະນາ ເມືອງຜາອຸດົມ ແຂວງບໍ່ແກ້ວ



ເກີດເຫດສະເທືອນຂວັນ ເມື່ອຜູ້ເປັນຜົວເກີດມີອາການປະສາດຫຼອນ ແລ້ວຈັບເອົາມີດແທ່ງເມຍ ຈໍານວນ 8 ບາດ ແລະ ລູກສາວ ອາຍຸ 5 ປີ ຈົນເສຍຊີວິດຄາ ຫ້ອງນອນ. ກ່ອນໃຊ້ມີດດວງທີ່ກໍ່ເຫດແທງຕົວເອງຈົນເສຍຊີວິດໃນເວລາຕໍ່ມາ.

ເຫດການດັ່ງກ່າວເກີດຂຶ້ນໃນ ວັນທີ 5 ທັນວາ 2018, ທີ່ບ້ານວຽງພັດທະນາ ເມືອງຜາອຸດົມ ແຂວງບໍ່ແກ້ວ. ຜູ້ເສຍຊີວິດຊື່ ນາງ ເຊັ່ງ ວາງ ອາຍຸ 29 ປີ, ນາງ ຊົງມີມົວ ອາຍຸ 5 ປີ ແລະ ຜູ້ກໍ່ເຫດ ຊື່ ທ້າວ ເຍຍມົວ ອາຍ 33 ປີ.

ພັຕ ຊູກຽດ ດາລາພອນ ຮອງຫົວໜ້າກອງບັນຊາການ ປກສ ເມືອງຜາອຸດົມ ແຂວງບໍ່ແກ້ວ ໄດ້ໃຫ້ສໍາພາດຕໍ່ນັກຂ່າວໜັງສືພິມຄວາມສະຫງົບ ໃນວັນທີ 6 ທັນວາ 2018 ວ່າ: ພາຍຫຼັງໄດ້ຮັບລາຍງານຈາກອໍານາດການປົກຄອງບ້ານວຽງພັດທະນາວ່າ: ຜົວໃຊ້ມີດແທງ ເມຍ ແລະ ລູກ ຈົນເສຍຊີວິດ. ຈາກນັ້ນ, ຈຶ່ງໄດ້ແຕ່ງກໍາລັງຕໍາຫຼວດພິສູດຫຼັກຖານ ແລະ ໜ່ວຍງານວິຊາສະເພາະ ລົງໄປປະສານສົມທົບກັບອໍານາດການປົກຄອງບ້ານ ເພື່ອກວດກາສະຖານທີ່ເກີດເຫດ.



ພໍໄປຮອດເຮືອນຜູ້ຖືກເຄາະຮ້າຍ ພົບເຫັນນາງ ເຊັ່ງວາງ ເສຍຊີວິດຢູ່ຫ້ອງນອນ ຕາມຕົນຕົວຖືກແທງດ້ວຍມີດ ຍາວປະມານ 30 ຊັງຕີ ແມັດ ຈໍານວນ 8 ຈຸດ. ໃນນັ້ນ, ຕາມຕົນຕົວ 6 ຈຸດ ແລະ ກ້ອງຂີ້ ແຮ້ເບື້ອງຂວາ ແລະ ຊ້າຍຂ້າງລະ 1 ຈຸດ. ຢູ່ດ້ານຂ້າງເຫັນລູກສາວນອນເສຍຊີວິດ ຊື່ ນາງ ຊົງມີມົວ ຖືກມີດແທງເຂົ້າທີ່ກ້ອງຂີ້ແຮ້ເບື້ອງ ຂວາ 1 ຈຸດ.

ສ່ວນຜູ້ກໍ່ເຫດຊື່ ທ້າວ ເຍຍມົວ ຜູ້ເປັນຜົວ ແລະ ພໍ່ຂອງຜູ້ເສຍຊີວິດ, ເຊິ່ງມີອາການບ້າປ່ວງເນື່ອງຈາກຜູ້ກ່ຽວເອົາມີດທີ່ໃຊ້ໃນການກໍ່ເຫດແທງຕົວເອງເຂົ້າທີ່ໜ້າເອິກ 2 ບາດ. ຈາກນັ້ນ, ຍາດພີ່ນ້ອງໄດ້ນໍາຕົວສົ່ງໂຮງໝໍ ແລະ ໄດ້ເສຍຊີວິດໃນເວລາຕໍ່ມາ.

ພັຕ ຊູກຽດ ດາລາພອນ ໃຫ້ຮູ້ຕື່ມອີກວ່າ: ສາເຫດການຄາດຕະກຳຄັ້ງນີ້ ເຈົ້າໜ້າທີ່ພວມດໍາເນີນການສືບສວນ-ສອບສວນໃຫ້ກະຈ່າງແຈ້ງ. ຕາມການສັນນິຖານໃນເບື້ອງຕົ້ນຜູ້ກໍ່ເຫດມີອາການຜິດປົກກະຕິທາງສະໝອງ ເນື່ອງຈາກວ່າຜູ້ກ່ຽວເຄີຍປະສົບອຸບັດຕິເຫດ ຕາມທ້ອງຖະໜົນ ໂດຍໄດ້ຮັບຜ່າຕັດສະໜອງມາແລ້ວ 1 ຄັ້ງ ແລະ ຍາດພີ່ນ້ອງໃກ້ຊິດຂອງຜູ້ກ່ຽວກໍ ຢືນຢັນວ່າຄອບຄົວນີ້ບໍ່ເຄີຍຜິດຖຽງກັນເຖິງຂັ້ນຮຸນແຮງ ແລະ ຜູ້ກ່ຽວບໍ່ມີປະຫວັດທີ່ພົວພັນກັບຢາເສບຕິດ.

ພາບ ແລະ ຂ່າວ: ນສພ ຄວາມສະຫງົບ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.