Header Ads

ໄຊຍະບູລີຈັດພິທີສະຫຼອງວັນສ້າງຕັ້ງກອງທັບຄົບຮອບ 70 ປີ



ໃນຕອນເຊົ້າຂອງວັນທີ 24 ມັງກອນ 2019 ທີ່ເດີ່ນສະໜາມຫຼວງແຂວງໄຊຍະບູລີ, ໄດ້ຈັດງານໂຮມຊຸມນຸມເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ໂດຍການໃຫ້ກຽດເຂົ້າຮ່ວມຂອງສະຫາຍ ພົນເອກ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກ, ລັດຖະມົນຕີກະຊວງ ປ້ອງກັນປະເທດ, ແລະ ໂດຍມີ ສະຫາຍ ພົງສະຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆໄຊຍະບູລີ, ແລະ ປະທານປ້ອງກັນຊາດ-ປ້ອງກັນຄວາມສະຫງົບແຂວງ ໄຊຍະບູລີ, ບັນດາສະຫາຍການນໍາຂັ້ນສູງຈາກສູນກາງ, ພ້ອມດ້ວຍບັນດາສະຫາຍໃນການນຳຂອງແຂວງ, ອົງການຈັດຕັ້ງມະຫາຊົນ, ບັນດານາຍ ແລະ ພົນທະຫານ, ພ້ອມດ້ວຍແຂກຖືກເຊີນທັງພາຍໃນ ແລະ ຕ່າງປະເທດ ຕະຫຼອດເຖິງ ມວນຊົນຊາວແຂວງໄຊຍະບູລີ ເຂົ້າຮ່ວມຢ່າງຫຼວງຫຼາຍ.




ໃນພິທີດັ່ງກ່າວ, ກ່ອນອື່ນ ບັນດາຜູ້ເຂົ້າຮ່ວມແມ່ນໄດ້ຮັບຊົມ ແລະ ຮັບຟັງການສະແດງສິລະປະ, ການຮ້ອງເພງ ແລະ ບົດຟ້ອນຕ່າງໆ ພ້ອມທັງ ຊົມການສະແດງກາຍຍະກໍາຂອງກອງພົນທີ 2 ໂດຍມີ 3 ລາຍການ, ການຫັດກາຍມືປືນ 1 ບົດ 24 ຈັ່ງວະ ແລະ ແທງກະບີ່ 28 ຈັ່ງວະ, ມວຍເຫລົ່າລົບກອງຕີພິເສດ ແລະ ຫັດກາຍມືເປົ່າ 2 ບົດ 24 ຈັ່ງວະ.
ຈາກນັ້ນ, ພິທີກໍ່ໄດ້ເລີ່ມຕົ້ນຂຶ້ນຢ່າງເປັນທາງການ, ໂດຍ ສະຫາຍ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ຂຶ້ນກ່າວສູນທອນພົດຕໍ່ພິທີໂຮມຊຸມນຸມ ຊຶ່ງໃນບາງຕອນສຳຄັນ, ທ່ານໄດ້ກ່າວວ່າ: ກ່ອນໜ້ານີ້ 70 ປີ ປະທານ ໄກສອນ ພົມວິຫານ, ຜູ້ນໍາທີ່ເຄົາລົບຮັກຂອງພວກເຮົາ ໄດ້ນໍາພາກໍ່ຕັ້ງກອງທັບລາວອິດສະຫຼະ, ແລະ ກໍ່ຕັ້ງກອງລາດຊະວົງຂຶ້ນ ໃນວັນທີ 20 ມັງກອນ 1949 ຢູ່ເຂດທີ່ໝັ້ນຕາແສງລາວຮຸ່ງ, ເມືອງຊຽງຄໍ້, ແຂວງຫົວພັນ; ນັ້ນແມ່ນມື້ແຫ່ງການກໍາເນີດເກີດຂຶ້ນຂອງກອງທັບປົດປ່ອຍປະຊາຊົນລາວ ກໍ່ຄື ກອງທັບປະຊາຊົນລາວວິລະຊົນ ນັ້ນເອງ.



ມາຮອດປະຈຸບັນ, ວັນດັ່ງກ່າວແມ່ນໄດ້ກາຍເປັນເຫດການສໍາຄັນໃນປະຫວັດສາດຍຸກໃໝ່ ຂອງຊາດເຮົາ, ຍຸກແຫ່ງການຕໍ່ສູ້ເພື່ອກອບກູ້ເອົາຄວາມເປັນເອກະລາດແຫ່ງຊາດ ມາໃຫ້ປະເທດຊາດ ແລະ ອິດສະຫຼະພາບມາໃຫ້ປະຊາຊົນເຮົາ, ໂດຍຜ່ານໄລຍະ 70 ປີແຫ່ງການຕໍ່ສູ້ກູ້ຊາດ, ການປົກປັກຮັກສາ ແລະ ການສ້າງສາພັດທະນາ ປະເທດຊາດ, ພາຍໃຕ້ການນໍາພາ ຂອງພັກປະຊາຊົນປະຕິວັດລາວ, ແລະ ໂດຍໄດ້ຮັບການລ້ຽງດູອູ້ມຊູຊ່ວຍເຫຼືອຈາກປະຊາຊົນ, ກອງທັບປະຊາຊົນລາວ ໄດ້ສືບທອດມູນເຊື້ອພິລະອາດຫານຕໍ່ສູ້ເດັດດ່ຽວບໍ່ຍອມຈໍານົນ ຂອງຊາດລາວ, ພະນັກງານນັກຮົບກອງທັບປະຊາຊົນລາວແຕ່ລະຫຸ້ນ ລ້ວນແຕ່ໄດ້ຜ່ານຜ່າອຸປະສັກຫຍຸ້ງຍາກນາໆ ປະການ, ໄດ້ເຮັດສໍາເລັດພາລະກໍາອັນລໍ້າເລີດ ທີ່ພັກ ແລະ ປະຊາຊົນມອບໝາຍໃຫ້; ສ້າງໜ້າປະຫວັດສາດຍຸກສະໄໝ ແລະ ມູນເຊື້ອວິລະຊົນ ຂອງຊາດລາວວິລະຊົນ; ສ້າງຜົນງານອັນໃຫຍ່ຫຼວງໂດຍການຕີສັດຕູຜູ້ຮຸກຮານ ແລະ ລູກແຫຼ້ງຕືນມືຂອງພວກເຂົາ ໃຫ້ປະລາໄຊຢູ່ຫຼາຍບ່ອນ, ສາມາດເປີດກວ້າງເຂດທີ່ໝັ້ນ, ສ້າງທ່າ ແລະ ກໍາລັງແຮງໃໝ່ໃຫ້ແກ່ຂະບວນການປະຕິວັດ ເຮັດໃຫ້ແອກປົກຄອງກໍ່ຄື ເຂດຄຸ້ມຄອງຂອງພວກລ່າເມືອງຂຶ້ນ ຖືກທັບມ້າງເປັນກ້າວໆມາ.



ໄປພ້ອມໆກັບຂະບວນການເຕີບໃຫຍ່ຂະຫຍາຍຕົວຂອງກອງທັບ ແລະ ປະຊາຊົນໃນທົ່ວປະເທດນັ້ນ, ກອງກໍາລັງປະກອບອາວຸດຢູ່ແຂວງ ໄຊຍະບູລີ ກໍ່ໄດ້ມີການປັບປຸງກໍ່ ສ້າງກໍາລັງໃຫ້ມີການເຕີບໃຫຍ່ເຂັ້ມແຂງຂຶ້ນເປັນກ້າວໆ; ທັງເຄື່ອນໄຫວສູ້ຮົບ, ທັງຫັດແອບກໍາລັງ, ຂົນຂວາຍປະຊາຊົນ, ກໍ່ສ້າງຮາກຖານ, ພ້ອມກັບປະຊາຊົນບັນດາເຜົ່າ ອອກແຮງສ້າງເຂດທີ່ໝັ້ນປະຕິວັດໃຫ້ເຂັ້ມແຂງໜັກແໜ້ນໃນທຸກດ້ານ, ສ້າງຮາກຖານຢູ່ເຂດແນວຫຼັງຂອງສັດຕູ, ເຄື່ອນ ໄຫວເປີດບັ້ນບຸກໂຈມຕີສັດຕູຢ່າງຕໍ່ເນື່ອງ ດ້ວຍຄວາມກ້າ ແກ່ນ, ເຊິ່ງສາມາດຍາດໄດ້ຈາກໄຊຊະນະນີ້ ໄປສູ່ໄຊຊະນະໃໝ່ ໃຫຍ່ຫຼວງກວ່າເກົ່າ, ເຊິ່ງເປັນການປະກອບສ່ວນອັນສໍາຄັນ ເຂົ້າໃນຂະບວນການລວມຂອງພາລະກິດປົດປ່ອຍຊາດໃນທົ່ວປະເທດ.
ຈາກນັ້ນ, ຂະບວນສວນສະໜາມກໍ່ໄດ້ເລີ່ມຕົ້ນຢ່າງເປັນທາງການ, ໂດຍເປີດສາກຈາກກ້ອນກາເຄື່ອງຫມາຍຂອງກອງທັບ ແລະ ກ້ອນຂະບວນທຸງໄຊ ທີ່ເປັນຕົວແທນໃຫ້ແກ່ບັນດາກົມກອງຕາມການປະກອບ, ການຈັດຕັ້ງຂອງກອງພົນທະຫານຮາບທີ 2 ແລະ ກອງບັນຊາການທະຫານແຂວງ ໄຊຍະບູລີ.
ພ້ອມດຽວກັນ, ຍັງມີອີກຈໍານວນ 24 ກ້ອນກໍາລັງ ລວມທັງໝົດ 26 ກ້ອນ ກໍ່ໄດ້ທະຍອຍກັນເດີນກ້າວເຂົ້າສູ່ສະໜາມຢ່າງເປັນທາງການ ແລະ ໃນຕອນທ້າຍຂອງພິທີ, ກໍ່ໄດ້ຮັບຊົມ ການສະແດງໂດດຈ້ອງ ຈາກທະຫານອາກາດ ກອງທັບປະຊາຊົນລາວ.

ນັກຂ່າວ: ຫ້ອງວ່າການແຂວງ ໄຊຍະບູລີ

ໂດຍ: ອຸ່ນເຮືອນ ໂພທິລັດ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.