ລາວ-ຈີນ ຮ່ວມມືຜະລິດພືດຜັກ ແລະ ໝາກໄມ້ສະອາດ

​ເມື່ອ​ບໍ່​ດົນ​ມາ​ນີ້ ທີ່ສູນ​ກະ­ສິ­ກຳ ແລະ ປ່າ­ໄມ້ ບ້ານ​ຊຽງ​ດາ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ​ໄດ້​ມີພິທີ​ວາງ​ສີ​ລາ​ລຶກ​ໂຄງ­ການ​ຮ່ວມ​ມື​ກ່ຽວ​ກັບ​ການ​ຜະ­ລິດ​ພືດ​ຜັກ ແລະ ໝາກ​ໄມ້​ສະ­ອາດ​ທີ່​ທັນ​ສະ­ໄໝ​ຢູ່ ສປປ ລາວ ໂດຍ​ມີ​ທ່ານ ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ທ່ານ​ນາງ ເອີ້ ເວ ບໍ­ລິ­ສັດ ໄໜ​ສຽງ​ພັດ­ທະ­ນາ​ກະ­ສິ­ກຳ​ແຂວງ​ໄຮ່​ລົງ​ຈ່ຽງ ຈຳ­ກັດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ. ທັງ​ນີ້, ກໍ່ເພື່ອ​ແນ­ໃສ່​ປະ­ຕິ­ບັດ​ຕາມ 3 ເສົາ­ຄ້ຳ 4 ແຜນ​ງານ​ຄື: ເສົາ­ຄ້ຳ​ກະ­ສິ­ກຳ ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ລຶບລ້າງ​ຄວາມ­ທຸກ​ຍາກ ເຮັດ​ໃຫ້​ປັດ­ຈຸ­ບັນ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ເລັ່ງ​ໃສ່​ຈັດ​ຕັ້ງ​ປະ­ຕິ­ບັດ 4 ແຜນ​ງານ​ໃຫຍ່​ຄື: ແຜນ​ງານ​ຄ້ຳ­ປະ­ກັນ​ສະ­ບຽງ​ອາ­ຫານ​ເພື່ອ​ຄວາມ​ໝັ້ນ­ຄົງ​ດ້ານ​ສະ­ບຽງ​ອາ­ຫານ ແຜນ​ງານ​ຜະ­ລິດ​ເປັນ​ສິນ­ຄ້າ ແຜນ​ງານ​ພັດ­ທະ­ນາ​ປ່າ­ໄມ້​ແບບ​ຍືນ​ຍົງ ແລະ ແຜນ​ງານ​ພັດ­ທະ­ນາ​ຊົນ­ນະ­ບົດ-ລຶ­ບລ້າງ​ຄວາມ­ທຸກ​ຍາກ ເພື່ອ​ເຮັດ​ໃຫ້​ບັນ­ດາ​ວຽກ​ງານ​ດັ່ງ­ກ່າວ ປະ­ສົບ​ຜົນ­ສຳ­ເລັດ​ຕາມ​ເປົ້າ​ໝາຍ​ວາງ​ໄວ້ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ເອົາ­ໃຈ­ໃສ່​ຢ່າງ​ຕັ້ງ­ໜ້າ​ເຂົ້າ​ໃນ​ການ​ສົ່ງ­ເສີມ​ປະ­ຊາ­ຊົນ ໃຫ້​ເປັນ​ເຈົ້າ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ຄຽງ​ຄູ່​ກັບ​ການ​ປະ­ສານ​ສົມ­ທົບ​ກັບ​ປະ­ເທດ​ໃກ້​ຄຽງ ເພື່ອ​ນຳ​ເອົາ​ວິ­ຊາ​ການ ແລະ ເຕັກ­ນິກ​ທັນ​ສະ­ໄໝ ເຂົ້າ​ມາ​ສົ່ງ­ເສີມ​ການ​ຜະ­ລິດ​ກະ­ສິ­ກຳ​ໃຫ້​ສູງ​ຂຶ້ນ​ເປັນ​ກ້າວໆ.

ກະ­ຊວງ​ກະ­ສິ­ກຳ ແລະ ປ່າ­ໄມ້ ຮ່ວມ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ແລະ ບໍ­ລິ­ສັດ ໄໜ​ສຽງ​ພັດ­ທະ­ນາ​ກະ­ສິ­ກຳ​ແຂວງ​ໄຮ່​ລົງ​ຈ່ຽງ ຈຳ­ກັດ ສປ ຈີນ ຈັດ​ຕັ້ງ​ປະ­ຕິ­ບັດ​ໂຄງ­ການ​ຮ່ວມ​ມື​ລາວ-ຈີນ ກ່ຽວ​ກັບ​ການ​ຜະ­ລິດ​ພືດ​ຜັກ ແລະ ໝາກ​ໄມ້​ສະ­ອາດ ໂດຍ​ໂຄງ­ການ​ມີ­ໜ້າ​ທີ່​ຫຼັກ​ແມ່ນ​ເປັນ​ສະ­ຖານ­ທີ່​ສາ­ທິດ ແລະ ອົບ­ຮົມ​ໃຫ້​ຄວາມ​ຮູ້​ແກ່​ຊາວ​ກະ­ສິ­ກອນ​ທົ່ວ​ປະ­ເທດ ກ່ຽວ​ກັບ​ການ​ຜະ­ລິດ​ກະ­ສິ­ກຳ​ສະ­ອາດ ໂດຍ​ໃນ​ໂຄງ­ການ​ຈະ​ສ້າງ​ອາ­ຄານ​ສາ­ທິດ ເຮືອນ​ປູກ​ທັນ​ສະ­ໄໝ ການ​ນຳ​ໃຊ້​ແສງ​ຕາ­ເວັນ ແລະ ໂຊ​ລາ​ເຊວ ຕະ­ຫຼອດ​ເຖິງ​ການ​ນຳ​ໃຊ້​ລະ­ບົບ​ນ້ຳ​ບາ​ດານ​ເຂົ້າ​ໃນ​ການ​ຜະ­ລິດ​ທັນ​ສະ­ໄໝ ແລະ ຄົບ​ຊຸດ ຄາດ​ວ່າ​ໂຄງ­ການ​ຈະ​ສາ­ມາດ​ຜະ­ລິດ​ພືດ​ຜັກ​ສະ­ອາດ​ໄດ້ 30 ຊະ­ນິດ 50.000 ກິ​ໂລ​ຕໍ່​ປີ ເພື່ອ​ແນ­ໃສ່​ສະ­ໜອງ​ພືດ​ຜັກ ແລະ ໝາກ​ໄມ້​ສະ­ອາດ ມີ​ຄຸ­ນະ­ພາບ​ສູງ​ແກ່​ສັງ­ຄົມ ກໍ່​ຄື ການ​ສົ່ງ​ອອກ​ໄປ​ປະ­ເທດ​ຈີນ ໂດຍ​ສະ­ເພາະ 5 ພືດ ທີ່​ຕະ­ຫຼາດ​ຈີນ​ມີ​ຄວາມ​ຕ້ອງ­ການ​ສູງ​ຄື: ສາ­ລີ ມັນ­ຕົ້ນ​ແຫ້ງ ກ້ວຍ ໝາກ­ໂມ ແລະ ເຂົ້າ­ສານ ເຊິ່ງ​ມີ​ຄວາມ​ຈຳ­ເປັນ​ທີ່​ລາວ​ຕ້ອງ​ຍົກ​ຄຸ­ນະ­ພາບ ແລະ ປະ­ລິ­ມານ​ການ​ຜະ­ລິດ​ບັນ­ດາ​ພືດ​ຜັກ-ໝາກ​ໄມ້​ຕ່າງໆ​ໃຫ້​ສູງ​ຂຶ້ນ ເພື່ອ​ຮອງ​ຮັບ​ການ​ຄ້າ​ຕ່າງ­ປະ­ເທດ ທີ່​ຈະ​ຂະ­ຫຍາຍ­ຕົວ​ໃນ​ອະ­ນາ­ຄົດ ພາຍ­ຫຼັງ​ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ​ຄວາມ​ໄວ​ສູງ ລາວ-ຈີນ.

ທີ່ມາ : ໜັງສືພິມວຽງຈັນໃໝ່

© ໂຕະນໍ້າຊາຂ່າວ | www.tonamchanews.com
___________