Header Ads

ລິດຢາ ບວກກັບ ຄວາມລະແວງເປັນເຫດ ຈົນເປັນດຫດ ລົງມືຄາດຕະກໍາເມຍ ຄິດວ່າເມຍຫຼິ້ນຊູ້



ເຈົ້າໜ້າທີ່ ປກສ ເມືອງທ່າແຂກ ແຂວງ ຄຳມ່ວນ, ສົມທົບກັບບ້ານ ໂຄກປ່າທ່ອນ ໄດ້ນຳຕົວ ທ້າວ ມອນສີ ຫຼື ສີມອນ (ຜູ້ຄາດຕະກໍາເມຍ) ໄປປະກອບແຜນຄໍາຮັບສາລະພາບຢູ່ສະຖານທີ່ເກີດເຫດ ທ່າມກາງພໍ່-ແມ່ປະຊາຊົນ ແລະ ຍາດຕິພີ່ນ້ອງມາຢືນເບິ່ງເປັນຈໍານວນຫຼວງຫຼາຍ.

ເຈົ້າໜ້າທີ່ ປກສ ເມືອງທ່າແຂກ ໃຫ້ຮູ້ວ່າ: ເຫດການດັ່ງກ່າວເກີດຂຶ້ນໃນເວລາ 6:00 ໂມງ ຂອງ ວັນທີ 19 ທັນວາ 2018 ທີ່ຜ່ານມາ, ເກີດຈາກຜູ້ເປັນຜົວເສບຢາບ້າ, ຜິດຖຽງກັນ ແລະ ລະແວງສົງໄສວ່າເມຍຫຼິ້ນຊູ້ ບໍ່ສາມາດຄວບຄຸມອາລົມໄດ້ ຈຶ່ງຈັບເອົາພ້າມາຟັນຄໍເມຍເສຍຊີວິດ; ຜູ້ກໍ່ເຫດຊື່ ທ້າວ ມອນສີ ຫຼື ສີມອນ ອາຍຸ 38 ປີ ປະຊາຊົນຢູ່ບ້ານ ໂຄກປ່າທ່ອນ ເມືອງທ່າແຂກ ແຂວງຄຳມ່ວນ ໄດ້ສ້າງຄອບຄົວກັບ ນາງ ວອນ ອາຍຸ 40 ປີ ປະຊາຊົນບ້ານສົ້ມ ເມືອງເຊບັ້ງໄຟ ແຂວງ ຄໍາມ່ວນ ມາແຕ່ປີ 2009 ໄດ້ມາດໍາລົງຊີວິດຢູ່ບ້ານໂຄກປ່າທ່ອນ ເມືອງທ່າແຂກ ມີລູກຮ່ວມກັນ 2 ຄົນ. ຕົກມາຮອດຕົ້ນປີ 2017 ຜູ້ເປັນຜົວໄດ້ເຄື່ອນໄຫວພົວພັນເສບຢາເສບຕິດ (ຢາບ້າ) ຢ່າງຕໍ່ເນື່ອງ ແລະ ເກີດມີແນວຄິດລະແວງສົງໄສຕະຫຼອດວ່າເມຍຫຼິ້ນຊູ້ ຈຶ່ງເຮັດໃຫ້ຄອບຄົວຜິດຖຽງກັນມາຫຼາຍຄັ້ງ ເຖິງຂັ້ນທຳຮ້າຍຮ່າງກາຍຜູ້ເປັນເມຍຈົນໄດ້ຮັບບາດເຈັບ, ຕໍ່ເຫດການທີ່ເກີດຂຶ້ນນັ້ນ ອຳນາດການປົກຄອງບ້ານ, ເຖົ້າແກ່, ລຸງຕາ ແລະ ຍາດພີ່ນ້ອງໄດ້ສຶກສາອົບຮົມໃຫ້ທັງສອງຄົນມາຕະຫຼອດ.

ແຕ່ຕົກມາຮອດເວລາ 6:00 ໂມງ ຂອງວັນທີ 19 ທັນວາ 2018 (ມື້ເກີດເຫດ) ນາງ ວອນ ໄດ້ຕື່ນໜຶ້ງເຂົ້າ, ແຕ່ງກິນ ແລະ ເຮັດວຽກເຮືອນ ຮອດເວລາ 7:00 ໂມງ ຜົວໄດ້ຊວນໄປເຝົ້າເຮືອນໃຫ້ປ້າ (ເອື້ອຍຜົວ) ຢູ່ບ້ານດຽວກັນ ແຕ່ຝ່າຍເມຍປະຕິເສດ; ຈາກນັ້ນ. ທັງສອງໄດ້ຜິດຖຽງກັນຢ່າງຮຸນແຮງ ຜູ້ເປັນຜົວຄວບຄຸມສະຕິບໍ່ໄດ້ ຈຶ່ງຈັບເອົາພ້າຢູ່ຂ້າງເຕົາໄຟ ແລ້ວຟັນຄໍເມຍ 3 ບາດ ລົ້ມລົງ ແລ້ວຟັນຕໍ່ຫຼາຍບາດຈົນເສຍຊິວິດຄາທີ່, ໃນເວລາຕໍ່ມາ ອຳນາດການປົກຄອງບ້ານ ໄດ້ກັກຕົວຜູ້ກໍ່ເຫດສົ່ງຕໍາຫຼວດເພື່ອດໍາເນີນຄະດີ.

ຜູ້ກໍ່ເຫດສາລະພາບວ່າ ຍ້ອນເສບຢາບ້າ, ຜິດຖຽງກັນ ແລະ ລະແວງສົງໄສເມຍຫຼິ້ນຊູ້ ບໍ່ສາມາຄວບຄຸມອາລົມໄດ້ ຈຶ່ງລົງມືຄາດຕະກໍາ.


ຂໍ້ມູນ : ນສພ ຄວາມສະຫງົບ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.